Shillong, Ïaïong 25: Na ka jingsuba ba ka lah ban don ka jingïadei sop sop hapdeng ka lok jong u bad u wei pat u briew, ka la lam pat sha ka jingïap briew ha ka sngi Saitjain ka 25 tarik u Ïaiong ha Mawblei, Shillong.
Katkum ka kyrwoh khubor na u Superitendent of Police ka East Khasi Hills u Bah Vivek Syiem u la pyntip ba mynta ka step ha ka por 8 baje u Sumeet Kr Singha 40 snem ka rta ba shong basah ha Mawblei u la shah shoh bad shah pynmynsaw ha u Sanjay Kumar 42 snem rta.
Kine baroh ar ngut kidei kiba ïa shong wai lang ha kajuh ka ïing bad na ka liang Sanjay Kumar u la pyndonkam da ka No Parking board ban tied ïa u Sumeet ong u Bah Vivek.
U Bah Vivek u la pyntip ruh ba daw jong ka jingshah shoh ka long ba une u lanot u la suba jur ba u Sanjay Kumar u don ka jingïadei bad ka tnga jong u kaba la pynlong ïa ka jingïakajia kaba jur bad poi syndon sha ka jingïashoh.
La rah noh mar mar ïa u sha Supercare Hospital hynrei ynda la poi ha katei ka jaka ai jingsumar, kila pynbna ba u la ïap lypa shabar.La kem noh ïa u nongshah kynnoh bad la register ïa ka case ba pyniap briew.
