Nongpoh, Naitung, 28: Tang na ka daw ka jingñiah khlem akor bad larlra shaba palat jong u nongñiah trok ban ioh knieh ïaid shakhmat ïa kawei ka Kali Honda kaba don ïa u number AS 01 PC 5312 bad ba la shong da ki nongwan kai pyrthei sha Meghalaya, ka Kali Honda ka la leit tynrah sha ka jingker ka surok National Highway-6 tang ban lait ka jingshah syllad ha ka trok kaba la pynher sted.
Kane ka la jia ha ka sngi u Blei ha ka por kumba 4:00 baje eiei janmiet ha 17mer ba hap ha ka thaiñ Byrnihat, Ri Bhoi bad ka trok tang mar iohlad ban knieh ïaid shakhmat ka la phet krad bad ka kali kaba shong ki nongwan jngohkai pyrthei ka la leit ban tynrah sha ka jingker ka surokbah.
Kane ka Kali tourist ka dei ka Kali ba la ñiah da u Rafique Rahman 40 snem uba la mynsaw malu mala bad kynthup 5 ngut ki nongshong hapoh jaka ba kynthup ïa ka Firoja Begum 35 snem, ka Fatema Begum 55 snem, u heprit Farhan Rahman 10 snem, u heprit Rahil Akhtar 11 snem bad ka Heprit Zara Rahman, kaba la mynsaw lang ha kane ka jingjia. Kine baroh ki dei na Kalapani, Bonfool Nagar Guwahati Assam
Kane ka la jia ruh katba kine ki nongjngohkai pyrthei ki dang mih na Shillong ban leit phai sha Guwahati.
Ka khubor ba la ioh lum na ki Pulit ka Ri Bhoi, la ong ba ïa ki ar ngut ba la mynsaw la pynkit sha Byrnihat PHC ban ioh jingsumar hadien ba ki la mynsaw malu mala.
Ki Pulit ki la pynlong ïa ka jingtohkit halor kane ka jingjia ban lap ïa ka Trok ba la ñiah khlemakor bad ïa ka kali Honda kaba la julor na ka bynta ba shakhmat la tan noh sha Byrnihat Police Station khnang ban nang bteng ïa ka jingtohkit.
