Nongpoh, Naitung, 28: Uwei u nongñiah jong ka trok kaba don ïa u nombar NL01–AF–3277 ba la tip kyrteng kum u Santu Rabha, 29 snem ka rta, u la shah rahbor ha ka kynhun jong ki san ngut ki runar kiba la wan da ka kali Bolero bym don number hadien ba ki la pynsangeh jubor ïa ka trok ha Shangbangla kaba hap ha ka surok National Highway-6 ha Ri Bhoi District.
Kane ka la jia ha ka miet 26 tarik mynta u bnai ha ka por kumba 10.30 baje mynmiet ha kaba la ong ba nongñiah trok katba u dang wan kit ïa ka kyiad (IMFL) na UCW Central Bonded Warehouse kaba don ha 9 Mer bad ïaid lynti ban leit buh ïa ka kyiad sha Gaddes Bond Warehouse sha Lad Rymbai u la shah pakhang lynti noh ha Shangbangla ha ka kynhun ki runar.
U Superintendent of Police ka Ri Bhoi u la iathuh ba ki san ngut ki runar hadien ba ki la pynsangeh jubor ïa ka trok ha Shangbangla ki la tan jubor ïa u nongñiah jong ka trok bad thep ha ka Bolero da kaba bom bad shoh ïa u bad hadien kata ki la pynhiar noh ynda la poi ha Umran Dairy.
Ki Pulit ki la ïathuh ba ka Bolero ba la pyndonkam da ki runar ka dei ka rong ba lieh bad kaba ym don number satia.
Ki Pulit ki ïathuh ruh ba tang hadien katto katne por la lap ruh ïa ka trok kaba la thylli ha Umjarasi ha kaba la suba jur ruh ba ïa ka kyiad la rong tuh da ki runar. Ïa ka trok la rah noh sha Nongpoh Police station.
Ia u nongñiah la pynkit noh sha Civil Hospital Nongpoh na ka bynta ban ioh jingsumar bad tang hadien katto katne por ki doktor ki la pynlait noh ïa u.
Na ka liang ki Pulit ruh ki la pynlong ïa ka jingthwet ïa ki runar ha shi lynter ka surokbah hynrei haduh mynta kim pat lapdien satia bad la suba ba ki runar ki la rong tuh ruh ïa ka kyiad.
