Shillong, Naitung 28: U MDC ka Tura u Bernard N Marak u buh ka jingkylli ba mano ba ju tuh ïa ka pisa jong ki shnong kiba duk kiba ju pyntrei ïa ka NREGA? Naba ka Village Employment Councils (VECs) ha Garo Hills ka la ïoh tang 50% ki tiar na ki nongsam bad ba ki nongsam ki la shah ot kumba 50% na ka pisa baroh ba la mang na ka bynta ban sam ne ai ïa ki tiar sha ki VEC. “Kane ka iehnoh khlem lah pyndep ïa kiba bun ki project ha ki shnong bad ïa kane ka jingkynnoh la buh pynban ha ki nongshong shnong da kaba ong ba ki shnong ki lah ban pyndep ïa ki kam hynrei ka jingshisha pat ka long da kumwei. Ki shnong ki ïohpdiang tang kumba 50% ka jingsam ïa ki tiar bad ka la pynlong ïa ki kam ban pyndep tang shiteng kum ki projek surok, ki tank, ki dam, bad kiwei,” kynnoh u MDC.
U la ïathuh ba ha kiwei pat ki jingjia, ïa ki bai bylla ba la pyni ba la thep lyngba ka online app, kam shym la paw ba ka don ha ki bank account jong ki shnong. U la kynnoh ruh ba ki don ki amount ba la thep ha ki account bapher bapher bad don katto katne ba la ot khlem ka jingïoh jingbit na ki shnong. “Kine ki kam kiba bakla ki la nangkiew hadien ba ngi la lap na ki jingleit jurip jong ngi sha ki shnong naba ngi don ki seceral apps kaba ngin lah ban sam ïa ki jingtip kaei kaba jia ha ki shnong kiba la buhrieh na ki shnong. Ha ki katto katne ki jingjia, bad kine ki kam bam sap ki la wanrah ka jingeh ïa ki shnong,” u la ong.
U la ong ba ki VEC secretary kim shym la ujor bad kane ka la buh ïa ka jingartatien hapdeng ki shnong halor ki kam bam sap jong ki VEC. Ki nongtrei ha ki block ki la kynnoh ïa ki secretary halor kane ka jingpyndonkam bakla haba ïadei bad ki bai bylla bad ka jingot kaba 50% na ki supplier na ka pisa kaba la mang ban sam ne thied ïa ki tiar ha kaba ki heh ophisar ki la ong ba kim tip eiei. “Mynta ka jingkylli ka mih ba mano ba tuh ïa ka pisa jong ki shnong kiba duk? Ka BJP kan sa khot ïa ki secretary bad kan tohkit halor kine ki kam bad kan sa ujor da ki FIR bad kan phah ïa ki kaiphot sha ka sorkar pdeng. Ka long kaei kaei kaba ym lah ban pdiang ba ka Meghalaya wat ba la synshar da ka sorkar ba ïatreilang bad ka BJP bad kum ka NPP, kum kine ki kam bamsap ki la jur bha. Ki la bun ki jingujor ba la ïohpdiang da ka seng bad ngi ngeit skhem ba kin dang mih hadien ba la dep ban ujor pyrshah ïa kiba donkti ha ki kam bam sap ki VEC,” ong u MDC ka Tura.
