Ha kine ki khyndiat sngi ba la dep ka nongbah Shillong ka la sakhi ïa ki kynrum kynram kiba jur bha la ka long naduh ka jingïakhih jong ki nonghikai kontrak kiba dawa na ka sorkar ba kan thung kam biang ïa ki haduh ka jingkynduh lang jong ki nongïalam balang bad ki kynhun niam bapher bapher kiba mih ban duwai ba ka sorkar kan sngap ïa ka jingkyrpad jong ki ban pynduh pyndam noh ïa ka aiñ khalai lane ka Meghalaya Regulation of Gaming Act, 2021.
Ka sienjam ba ka sorkar ka shim da kaba sdang shwa da ka jingkular ban pyndam noh ïa ka aiñ khalai lehse kan pynjem ïa ka jingkhihwin jong kiba bun ki kynhun seng khamtam ki nongïalam balang kiba la ieng rangbah ban pyrshah jur ïa ka jingthmu jong ka sorkar ban pyntreikam ïa katei ka ain bad kumjuh ruh ban buh ïa ka ktem khalai lane ka casino ha khappud jong ka Ri Bhoi district.
Katkum ka jingkren jong u myntri ka tnad Taxation ka sorkar jylla, James K Sangma ka sorkar ka la shim ïa katei ka sienjam ban phah pyndam noh ïa katei ka aiñ kadei beit halor ka nongrim ba ki nongshong shnong ka jylla kim sngewtynnad satia ïa katei ka aiñ ba kan treikam ha u pud u sam jong ka jylla namar kan pynlong laitluid ïa ka kam khalai lada la ithuh noh ïa ka da ka aiñ.
Lah ruh ban ong ba katei ka sienjam ba la shim da ka sorkar jylla hapoh ka jingïalam jong u James Sangma ka la ai ka jingkyrmen ruh ïa ki sngi kiba bha na ka bynta ka jylla lada jia ba katei ka jingkren jong u ka urlong shisha kumba la kular. U Myntri u la ong ruh ba katei ka rai ba ki shim kadei ruh namar ba ka sorkar ka kwah ban pyni ba ki sngap ïa ka sur u paidbah bad ki burom ruh ïa ka jingsngew jong ki haba ïadei bad ka imlang sahlang.
Lah ruh ban ong ba katei ka sienjam ba ka sorkar ka shim kadei namar kam kwah ban pynthut lane pynsngewsih ïa ki kynhun bapher bapher namar ka elekshon jied MLA ka sah sa tang kumba katto katne bnai bad kumta lada bakla ka rai khlem pep ka jingkhih pyrshah jong ki paidbah kan ktah kylla ïa ki ha ka jingpynkhreh na ka bynta katei ka elekshon. Kadei ruh ka jingshisha ba lada jia ba ka sorkar kam rai kloi ïa katei ka mat, khlem artatien ka jingkhih win ki kynhun kan bteng bad kan ktah ruh ïa ka lyer elekshon.
Lada kren pat ïa ki mat ba ka jylla ka ïakhun la ka long naduh ka ishu dawa pyntreikam noh ïa ka Inner Line Permit bad ruh ïa ka jingdawa pynrung noh ïa ka Ktien Khasi imat kin kylla long ar tylli ki mat kiban pynshongshit bha shwa ka samoi elekshon. Kan dei ruh ka kabu ksiar na ka bynta ki liang pyrshah ban kren ha ki rynsan elekshon lada jia ba ka sorkar pdeng kam pat ai satia ïa kitei ki mat jingdawa. Hynrei lada jia pat ba ka sorkar pdeng ka pynurlong noh lehse ka jingkmen kan dei ïa baroh la ka long ïa ka liang pyrshah lane ïa ka liang synshar.
Ki dang don shibun ki mat kiba ïadei na ka bynta ka bit ka biang jong ka jylla kiba kane ka sorkar ka dang hap ban pynurlong ha shwa ka elekshon la ka long naduh ka jingpyntreikam pura ban pynpoi um ha ki iing ki sem, ka jingpyndep ïa ka jingshna pynheh ïa ka surok Shillong sha Dawki bad bun kiwei kiwei ki projek kynthup ïa ka jingshna ïa ki ophis block ha kylleng ka jylla.
