Na Airport Guwahati leit shaw hi u MLA ka Mawhati ïa ka Nongjri PSS

Nongpoh, Nailar30: U MLA ka Mawhati Constituency bad uba dei ruh u President ka Managing Committee ka Nongjri Presbyterian Secondary School ha Ri Bhoi District, mynta ka sngi da lade u la leit ban pdiang burom ïa ka kynhun ïalehkai ka Nongjri Presbyterian Secondary School na Guwahati Airport, kaba dei hadien ba kane ka kynhun ka la wan phai sha ka jylla da kaba wan rah ruh ïa ka nam kum ka kynhun laduh ka International Subroto Cup 2024 ba la pynlong ha Bengaluru.
Kane ka kynhun ïalehkai jong ka Nongjri Presbyterian Secondary School, ka dei ka kynhun ba mihkhmat ïa ka jylla Meghalaya sha ka International Subroto Cup 2024 bad mynta ka la ioh ban wan phi sha la ka jylla, ka dei hadien ba ka la rah ïa ka nam lahduh ban pynrem noh ïa ka Uttar Pradesh da kaba la pynbam haduh 3 kol ha ka jingïakhun phainal kaba la long ha ka 28 tarik u Nailar 2024 ha Bengaluru.
Da ka mynsiem jong ka jingkmen halor kane ka jingjop, u Bah Charles Marngar kum u nongmihkhmat ka Mawhati Constituency bad uba dei ruh u President ka MC katei ka skul, mynta ka sngi da lade u la hiar sha Airport ha Guwahati na kabynta ban pdiang burom ïa katei ka kynhun, hadien ba ki la poi ha katei ka Airport kaba kum u nongmihkhat u dap shisha da ka mynseim ka jingsarong kaba la long ka burom ïa ka Ri Bhoi bad ka jylla hi baroh kawei.
Haba ai jingkren ruh ha kane ka sngi, u Bah Charles Marngar u la pynpaw ka jingkmen kaba khraw halor kane ka jingjop kane ka kynhun kum ka laduh ha ka International Subroto Cup, kaba la long ka burom ym tang ïa ka skul bad ka dong Ri Bhoi bad ka burom ka long ka burom ïa ka jylla hi baroh kawei.
Kum u MLA bad uba dei ruh u President ka Managing Committee katei ka skul, u la ai khublei kyrpang ruh ïa ka Kong Kynjaisi Sylliang kaba don ïa ka Na Rympeit Youth welfare Organization Football Academy ba la ioh ban pyntbit ïa ki rangïalehkai kane ka kynhun kaba la poi sha ka thong jong ka jingjop.
U la ai khublei ruh naduh ka Directorate of Sport and Youth Affairs, ka ophis u District Sport Officer, ki nonghikai bad ki bor pynïaid ka skul kiba la ïa trei lang ban kyntiew ïa kane ka kynhun shaduh ka thong ba kan ioh rah ïa ka nam lahduh jong ka International Subroto Cup 2024 ha Bengaluru.
Shuh shuh, kaba kham kyrpang u la ai khublei ruh ïa ka sorkar jylla bad ruh ïa u Myntri rangbah ka jylla, u Conrad K. Sangma, uba la kyrshan ban ïarap ruh ïa kane ka kynhun halor shibun ki jinglut jingsep bad kymen skhem ba kane ka kynhun kan dang kiew shaphrang da ka jingkyrshan jong ka sorkar bad khamtam u myntri rangbah ka jylla, u la bynrap.