SHILLONG, Kyllalyngkot 04: Ka sienjam kaba saw (4) jong ka lympung Shillong Sports Association Women’s Football League 2025 kan sdang ha kane ka Lah sngi U Blei (05 tarik u Kyllalyngkot, 2026) da lai tylli ki jingïalehkai ki ban long ha madan First Ground-SSA Stadium, Polo.
Yn plie pyrda ïa ka jingïalehkai ba nyngkong hapdeng ka Laitkor SC kaba bat ïa ka nam lahduh, pyrshah ïa ka Nongthymmai SC ha ka por 10:30 baje mynstep; nangta ka PFR FA kan aireng pyrshah ïa ka Mawkasiang SC ha ka por 12:30 baje mynsngi; bad ka jingïalehkai ba khatduh kan long hapdeng ka Rangdajied United pyrshah ïa ka Nongrim Hills SC ha ka por 2:30 baje nohphai sngi.
Mynta ka kynti kin don haduh 13 tylli ki kynhun ki ban ïashim bynta bad la phiah ïa ki ha ki lai tylli ki Group (A, B bad C). Ka Group A bad C ki don mar saw tylli ki kynhun, katba ka Group B kadei kaba heh tam, ha kaba ka don don san tylli ki kynhun.
ïa kane ka lympung yn pynïalehkai ha ka rukom ïakhun Group League, ha kaba ki kynhun nongjop bad kiba wan kyrdan ba-ar na kawei pa kawei ka Group (A, B, C) bad ar tylli ki kynhun kyrdan ba-lai ba kham kynsai kin ïoh rung sha ka Quarter Final, ïa kaba yn pynïakhun ha ka rukom ïalehkai kaba tang shi wait ne Knock Out.
Ka Group A ka kynthup ïa ka Laitkor SC ka kynhun kaba bat ïa ka nam lahduh, ryngkat ka Nongthymmai SC, Mawshbuit SC bad ka Umrynjah SC; ka PFR FA, Mawkasiang SC, Lawei SC, Lumparing SC bad ka Lawsohtun SC ki la shah kynthup ha ka Group B; nangta ka Group C ka don ïa ka Rangdajied United FC, Nongrim Hills SC, New Challenger FA bad ka Kharang SC.
Ka por ïalehkai kan long 70 minit ha ka group stage. Naduh ka Quarter Final ter ter ka por ïalehkai la mang 90 minit. Ha ka Quarter Final lada jia ba ki jingïakhun ki kut ha ka jingïakhaid, yn rah beit beit sha ka penalty shootout ban rai ïa ka nongjop. Hynrei ha ka Semi Final bad Final kan kynthup ruh ïa ka extra time bad kumjuh ruh penalty shootout lada jia ba ïakhaid.
Ki jingïalehkai Group stage kin bteng haduh 14 tarik u Kyllalyngkot. ïa ki jingïakhun Quarter Final yn pynlong ha ka 16 bad 17 tarik Kyllalyngkot, nangta baroh ar tylli ki Semi final yn pynlong ha ka 20 tarik, bad yn pynkut ïa ka lympung ha ka 24 tarik Kyllalyngkot-2026 (final).
