Shillong, Lber 29: Ka por ka la dei, ha kaba ka NorthEast United FC kan aireng pyrshah ïa ka Jamshedpur FC ha ka jingïakhun kaba kongsan na bynta baroh arliang mynta ka Sngi U Blei, na bynta ka Playoff (Knockout 2) jong ka Indian Super League (ISL 2024-25) ban long ha JN Stadium, Shillong.
Kumban shu pynkynmaw, ka NorthEast United FC ka la pynliem baroh arsien ïa ka Jamshedpur FC ha ki jingïakhun jong ki ha ka league stage — ha kaba ka jingïakhun hala ïing ka la jop kput da 5-0 kol bad da 0-2 kol shabar nala ïing. Baroh ar liang ki la pyndep ïa ka lynti ïaid jong ki ha ka league da kaba kamai 38 poiñ na ki 24 tylli ki jingïakhun hynrei ka NorthEast United FC kan ïoh ïa ka jingmyntoi ha la ïing ha ka playoffs namar ka don ïa ka resol kaba kham bha haba ïanujor bad bishar ïa ki jingïalehkai ba ladep hapdeng jong ki.
Hynrei u coach ka NorthEast United FC u Juan Pedro Benali u la ban jur ba ki ar tylli ki jingïalehkai ba ladep kim don jingktah eiei ïa ka jingïakhun la sngi U Blei. “Ka mynnor kam don jingïadei ei ei bad ka (ka jingïakhun). Kane ka dei ka quarterfinal, ka dei tang shi sien ïakhun. Ka dei ban jop ne ban rem (do or die).”
“Baroh ar tylli ki kynhun ki kwah ban rung sha ka semifinal. Ka don sa kham khyndiat ka jingban khia ha Ngi, ban ïalehkai ha khmat ki nongkyrshan jong Ngi. Ym don jaka ban shu hun. Ngi dei ban ïalehkai da ka jingsngewskhem, ban bat skhem ïa ki jingthmu jong Ngi ban khanglad ïa ka liang pyrshah bad lada Ngi leh kumta, Ngin sa jop,” la bynrap u Benali.
Ka NEUFC ka la ïalehkai ïa ka phutbol kaba thikna ha kane ka samoi bad ka la thep 46 kol ha ki jingïakhun league stage, ka duna tang kawei ka kol ïa ka Mohun Bagan SG kaba la thep 47 kol.
U rangïalehkai ba shakhmat na Morocco, u Alaaeddine Ajaraie, u la don ha ka lynti kaba seisoh bha, da kaba thep 23 kol tylli ki kol kynthup 7 tylli ki assist naki 24 tylli ki jingïalehkai.
Pyrshah ïa ka Jamshedpur, u la thep 2 kol ha baroh ar tylli ki jingïakhun bad ka kawei ka assist ha ka por ba jop da 5-0 kol. U Ajaraie u la ïoh ïa ka jingkyrshan kaba thikna na ki arngut ki rang ïalehkai na Spain kata u Nestor Albiach (6 kol bad 1 assist) bad u Guillermo Fernandez (5 kol).
Ki arngut ki rangïalehkai na India kata u Jithin MS (2 kol bad 7 assist) bad u Parthib Gogoi (2 kol bad 3 assist) ki la nang pynkhlaiñ shuh shuh ïa ka NEUFC.
Kan long ka jingïakhun kaba jwat bha. Ka Jamshedpur ka don ka rukom ïalehkai jong ki, hynrei Ngi pat Ngi don la ka jong ka rukom ïalehkai. Lada Ngi kwah ban poi sha ka semifinal, Ngi hap ban ïalehkai kum ka kynhun, ïakhun shitom bad lada Ngi leh kumta, Ngin sa jam shakhmat,” la ong u kapten ka kynhun, u Michel Zabaco.
“Wan la sngi U Blei, ka kynhun u Juan Pedro Benali ka khmihlynti ban pynlong kam ha ka por ba kongsan bad ban buh jaka ha ka semi final jong ka ISL bad ban buh ïa ka tarik pyrshah ïa ka Mohun Bagan SG.
