Mynshwa ki khuslai kumno ban ïoh ïa ka bam, hynrei mynta ki khuslai kumno ban bret ïa kaei ba ki ladep bam: DC

Mawkyrwat, ‘Nailur, 22: Ka ophis jong u Primary Health Engineering (PHE) Maw-kyrwat Division ka la ïoh ban pynlong ïa ka prokram ban pynkup burom ïa ki ar tylli ki shnong kiba la ïoh ïa ka khusnam halor ka Swacch Survekshan Gramin 2023 kata ïa shnong Nonglang bad ka shnong Langtor ha ka jingïalang ba la long ha ka Hall jong u Executive Engineer PHE, Mawkyrwat Division, South West Khasi Hills District ha kaba u bah T. Lyngwa, IAS, Deputy Commissioner jong ka South West Khasi Hills District u la long kum u kongsan.
U bah T. Lyngwa, IAS, Deputy Commissioner, South West Khasi Hills District haba kren kum u kongsan ula ong ba ïa kane ka prokram la pynlong ha kaba ïa dei bad ka khuid ka suba ba la pyntreikam naduh u snem 2018 bad da kaba khmih lynti ba kane ka prokram kan lah ban plie ïa ki jingmut jingpyrkhat jong ki paidbah nongshong shnong halor ka jingkordor jong ka jingkhuid jingsuba naduh ki ïing ki sem bad ha ki shnong ki thaw bad ban pyrkhat nangne shakhmat kumno ban don ka jaka theh ñiut kaba biang bad kaba paka khnang ban lait na kaba bret ñiut pathar kiba pynjaboh ïa ki lynti ki syngkien bad wanrah ïa ki jingpang kiba har rukom bad ryngkat ka jingaimynsiem ba ka sorkar ka kloi ban kner ki lad jingïarap na ka bynta kane ka jingthmu ba bha jong ki shnong ki thaw.
“Ha ki por ba mynshwa ki khuslai ban pyrkhat kaei ba kin bam, hynrei mynta pat ki khuslai shano ban bret ïa kaei kaba ki ki la bam”, ong u DC. Namarkata, u la kyntu ba ha kum kane ka juk ba mynta ka la dei ka por ba ha ki shnong ki thaw ki dei ban don lypa ïa ki jaka theh ñiut kiba paka namar ynda ki shnong ki thaw ki la sdang kiew ha ka jingbun briew hangta kin sa shem jingeh shano ban bret.
Shuh shuh ha ka jingkren jong u u la hikai bad pynshlur ïa ki briew kumno ban pyndonkam biang ïa ki mar ki bym pyndonkam shuh ne zero waste namar lada nang ban shna bad kham pynitynnad kine ki mar ki lah ban wanrah bun ki jingmyntoi. Nangta, u la ïaroh ïa kine ki shnong kiba ïoh ïa kane ka khusnam Swacch Survekshan Gramin 2023 kata ka shnong Nonglang bad shnong Langtor. Ula pynshlur ïa kiwei ruh ba kin bud ïa kane ka nuksa bad kyntu ruh ïa ki nongshong shnong ban shimkhia ban don ka jingïatreilang ha baroh ki liang na ka bynta ka bha ka miat jong ki shnong ki thaw.
Kiwei de kiba ïadonlang ha kane ka sngi ki long u bah L.T. Tariang, MCS, Additional Deputy Commissioner bad kum u Project Director jong ka DRDA, South West Khasi Hills District, u bah S. Marweiñ, MCS, Block Development Officer jong ka Ranikor C&RD Block, u bah S. Kharbteng, Sub Inspector of Schools, u bah I. Kharbudon, Sub Divisional Officer jong ka PHE, Mawkyrwat Division.
U bah Shekborlin Shiangbai, District Co-ordinator BDBM Mawkyr-wat Block uba la pynïaid ïa ka jingialang u la ai ïa ki kyntien pdiang sngewbha katba u bah Joystarding Lyngdoh Block Co-ordinator Mawkyrwat u la ai ki kyntien khublei.