Shillong, Rymphang 05 : U Working President ka UDP ba dei ruh u Myntri ka sorkar jylla, Bah Paul Lyngdoh ha ka sngi Nyngkong u la ong ba kam dei shuh ka kam kaba phylla haba ïadei bad ka rai jong ka sorkar ban pynjlan ïa ka samoi treikam jong ka KHADC bad JHADC sa 6 bnai.
“Kaei kaba nga lah ban ong ba kane kam dei shuh kaba dang thymmai. Ha ki por ba la dep ka Garo Hills Autonomous District Council kala shah pynjlan haduh arsnem ha ka por ba u Dr. Mukul Sangma u bat kum u Myntri Rangbah. Kumta ka jingpynjlan ïa ka samoi treikam sa 6 bnai lada nujor bad kaei kaba la leh mynshwa ar snem ka dang dei kaba lyngkot eh,” ong u Myntri haba kren bad ki lad pathai khubor.
Shuh shuh u ong ruh ba ha u snem ba la dep ka district council ka la pyntip sha ka sorkar jylla ïa ka jingdonkam ban pynbeit thymmai biang ïa ki constituency bapher bapher ba hap ha u pud u sam jong ki.
“Kumba phi tip ba don na kine ki constituency kiba don ki nongthep vote tang 15,000 – 19,000 ngut hynrei don pat ki constituency kiba don lai shah ka jingbun briew. Kumta ba kan long ryntih lang la dei ba kan don ka jingpynbeit ba khnang uto u MDC un lah ban mihkhmat ïa ki paidbah kaban ïahap lang kumba long lem kiwei pat ki MDC ha man ki constituency.”
