Shillong, Rymphang, 05: Ka Khun Hynñiewtrep National Awakening Movement (KHNAM) ha ka Lah Sngi u Blei ka la ong kam don jingpyrshah eiei ruh em halor ka jingtyrwa ka Sorkar Jylla ban pynjlan ïa ka samoi treikam jong ka Khasi Hills Autonomous District Council bad ka Jaiñtia Hills Autonomous District Council na ka bynta hynriew bnai lada la leh katkum ki kyndon ba la bthah ha ka Section 6A jong ka Khyrnit Bahynriew.
“Hynrei kane ka jingtyrwa ba mynta ka long pyrshah ïa ka Section 6A jong ka Khyrnit Bahynriew kaba kdew shai, “haba ka don ka jingpynbna ïa ka Emergency ba kan treikam lane lada ka mih kano kano ka daw, ha ka jingsngew jong u Lat, ka jingpynlong elekshon ka bym treikam, lah ban pynjlan da u Lat ban ym palat ïa ka shi snem bad lada jia ba ka jingpynbna ïa ka Emergency ka la treikam kam dei ban palat ïa ka samoi kaa hynriew bnai hadien ba la pynbna. Namarkata, kumba ka long mynta kam don kano kano ka Emergency bad kam don nongrim hi ruh ïa u Lat ban phah pynlong ïa ka elekshon ka bym lah ban treikam,” la kynnoh ka KHNAM ha u kyrwoh ba la phah da u Working President Bah Thomas Passah.
“Na ka por sha ka por, ngi la ïohi ba ka Sorkar Jylla ka la tuklar ïa ka jingtreikam ba laitluid jong ki Council bad ka ladei ka por ban pynneh katkum ka aiñ ïa ka jinglong ba laitluid ha ka synshar ka khadar,” la bynrap u kyrwoh.
“Ka jingtyrrwa jong ka Sorkar Jylla ym tang ba ka pynkhein ïa ka kyndon jong ka Khyrnit Bahynriew hynrei ka pynduh ruh ïa ka hok jong ki paidbah ban jied pynthymmai ïa ki nongmihkhmat ha ka por kaba dei. U Lat un hap ban shim ïa ka rai bad ngin sa phah ïa ka jingthoh sha u Lat bad ban kyrpad ïa u ban ïada ïa ka kyndon jong ka Para 6A jong ka Khyrnit Bahynriew ka Riti Synshar ka ri India,” la ong ka KHNAM.
