Mynsaw ka Longkmie ba shah thombor ha u runar katba dang thmu leit trei sha Umroi Airport, shah kem uwei

Nongpoh, Lber 19: Ha kawei na ka jingjia ba sngewsih kaba la jia mynta ka sngi, kawei ka longkmie ka la mynsaw jur hadien ba uwei u runar u la wan thombor pyrshah ïa ka, katba ka dang thmu ban leit trei sha Umroi Airport.
Kane ka jingjia ka la jia mynta ka sngi ha ka por 8 baje mynstep, ha kaba la ong ba katei ka Longkmie ka dang leit trei sha Airport bad shuwa ban poi sha Airport la mih kynsan uwei u runar uba la thombor ïa ka, da u bilor beer ba nep bad da u maw haduh ba ka la mynsaw.
Katkum ka tyllong khubor ba la ioh lum na ki Pulit ka Ri Bhoi, la ong ba kane ka Longkmie la tip kyrteng kum ka Ellana Lyngdoh Mawphalang (27), kaba shong basah ha Madanrting,Shillong bad ka wan sahwai ha ka shnong Umroi Nongrah na ka daw ba ka trei ha Umroi Airport, hynrei mynta ka step khlem poi pyrkhat katba ka dang thmu leit trei ka la shah thombor pynban ha u runar uba la phet noh hadien ba la pynmysaw ïa ka.
La ong ruh ba ïa kane ka Longkmie la rah noh mar mar sha CHC Bhoirymbong ban ioh ïa ka jingsumar kaba mardor halor ka jingmynsaw jur, hynrei namar ba la jur ka jingmynsaw la rah noh sha NEIGRIMHS, Shillong ban ioh ïa ka jingsumar kaba kham paka.
La ïathuh ruh ba ki Pulit ka Khapmara PIC, tang ma ïa ioh jingtip halor kane ka jigjia, ki la hiar mardor sha katei ka jaka ban pynlong ïa ka jingtohkit kaba bad hadien ba la poi ki pulit la shem ba utei u runar u la dep phet na katei ka jaka.
Na ka liang ki pulit ka Ri-Bhoi khlem shongthait kila buddien ban pynlong ka jingtohkit bad thwet ïa u runar ba donkti ha katei ka kam, bad hadien ka jingtrei shitom mynta ka miet kila ïoh ban kem noh ïa u.
Ïa une u runar ba suba donkti ha kane ka kam la ithuh kyrteng kum u Kyrshanlang Marngar 21 snem ka rta naka shnong Umroi Nongrah Dongrudwah bad ka jingtohkit mynta ka dang ïaid shakhmat ban lap ïaka daw tynrai halor katei ka jingthombor pyrshah ïa katei ka samla.