Shillong, Lber, 19: U Myntri Rangbah ka Jylla Conrad K. Sangma ha ka sngi Balang u la kyrpad ïa ka Sorkar Pdeng ban ailad ïa ka Jylla na ka bynta hynriew bnai ban pyndep ïa ka jingpynrung kyrteng bad ban pynïasoh ïa baroh ki nongïoh jingmyntoi na ka Supplementary Nutrition Programme lyngba u Aadhaar bad eKYC bad Facial Recognition System.
Ha ka shithi ba la phah sha ka Myntri ka Sorkar Pdeng kaba khmih ïa ka tnat Women and Child Development ka Annapurna Devi, u Sangma u ong, “ka jingpyrshang ba khlem thait ban pynshai ïa ka e-KYC bad Facial Recognition System ka ladep sdang. Kumta, nga kyrpad da ka jingsngewrit ban ai ïa ngi ïa ka por kaba hynriew bnai ban pynlah ïa ngi ban pynrung kyrteng bad pynïasoh ïa baroh ki nongïoh jingmyntoi jong ngi lyngba u Aadhaar bad ka eKYC bad ka Facial Recognition System khnang ba kan long ka jingmyntoi kaba khraw ïa ka jylla.”
“Nga kyrpad ruh da ka jingsngewrit lada long kaba lah ban ailad ïa ka Jylla ban kynthup ïa baroh ki nongïoh jingmyntoi MPR jong ngi kiba la buh jingthoh bad ba la pynrung kyrteng ruh na ka bynta ka SNP haduh kata ka por,” u la pynpaw
Haba pynpaw ïa ki jingeh ba ka Jylla ka ïakynduh ha kaba ïadei bad ka Supplementary Nutrition Programme, u Sangma u la ong ba katkum ka jingkheiñ jong ka MPR ka Jylla ka don haduh 5,85,254 ngut ki nongïoh jingmyntoi katba hapoh ka POSHAN TRACKER ki don tang 4,00,572 ngut ki nongïoh jingmyntoi POSHAN 2.0. Kane ka mut ba 1,84,682 ngut ki nongïoh jingmyntoi ki shah iehnoh beiñ.
“Kane ka long kumba ka paw 31.56% na baroh ki nongïoh jingmyntoi jong ngi kiba dei hok bad kiba la pynrung kyrteng kiba nang duh noh namar ki daw bapher bapher,” u la ong.
Shuh shuh, u Myntri Rangbah u la pyntip ruh ba ka Sorkar Jylla ka la pynjur ïa ka jingpyrshang ban pynrung kyrteng Aadhaar. Ka jingthied ïa ki Smartphone na ka bynta ki nongtrei Anganwadi ka dang don ha ka bynta ba khatduh, u la bynrap.
Haba ai khublei ïa ka tnad na ka bynta ka jingtrei shitom na ka bynta ka bha ka miat jong ki khynnah bad ki kynthei, u Sangma u la ong ba ka Meghalaya ryngkat bad ka Early Childhood Development Mission ka thmu ban kyntiew ïa ki khynnah naduh ba kha haduh ba kin da dap ïa ka rta kaba 8 snem.
“Ki thong bad jingthmu jong ngi ki ïahap bad ka jingthmu jong ka Ministry of Women and Child Development katba ngi dang ïakhun pyrshah ïa ka jingduna bam bad ban pynduhjait ïa ka jingduna bad ka jingpynlut kai ha ka jylla jong ngi,” u la ong.
