Mynsaw bun ki briew bad julor ki ïing ki sem ha SWGHD ba wan syllad kynsan ka erïong

Shillong, ïaïong 27: Ka khubor ba la ïoh na ki bor pynïaid district la ïathuh ba ka erïong kaba la khyrwit kynsan ha South West Garo Hills District ka la ktah ïa kiba bun bah ki shnong bad ha kane ka jingjia haduh 76 ngut ki briew kila mynsaw bad bun bah ki ïing ki sem ki la julor.
Ka ophis jong ka Deputy Commissioner ka la ïathuh ba ki jaka kiba la shah ktah palat dei ka Rerapara, Zikzak bad Purakhasia C&RD Block. Ha Rerapara Block ki la don 36 ngut kiba la mynsaw ha ki san tylli ki shnong kiba la shah ktah bad bun bah ki ïing ki la julor.
Ha Zikzak C&RD Block la ïoh jingtip ba 28 ngut ki briew kila mynsaw bad san tylli ki ïing ki la julor bad lai tylli ki shnong, ki ïing ki la shah ktah malu mala, ha Purakhasia, 12 ngut ki briew kila mynsaw bad artylli ki ïing ki la julor ha ki artylli ki shnong.
La ïathuh ruh ba ki don 12 tylli ki ïing kiba la shah pynjulor bad 11 tylli kiba la shah pynjulor malu mala ha ki 10 tylli ki shnong ha kane ka jingwan lynshop ka mariang. Ha kane ka jingwan ka erïong bad ka jingshah pynkhyllem ki dieng, ka la ktah ruh ïa ka jingsam ïa ka bording elektrik bad bun ruh ki tiar bad ki sainar ding elektrik ki la shah pynjulor.
Na ka liang jong ki bor ba dei peit kila ïaleh kloi lan katba lah ban pynbha ïa ki jingsam ïa ka bording elektrik bad ïa ki lad jingïarap la phah sha kito ki longïing kiba la shah ktah bad na ka liang jong ki bor jong ka District Administration ki dang peit ban nym jia kano kano kaba sngewsih kaba jur na kane ka jingwan lyngshop jong ki bor ka mariang.