Mynjur ka General Council ban khylliap lama ïa ka PDF, mynta yn leit pynïasoh sha ka NPP

Shillong, Jymmang, 05: Ka General Council jong ka seng saiñpyrthei Peoples Democratic Front (PDF) ha ka sngi Thohdieng ka la shim ïa ka rai ban khylliap lama noh ïa kane ka seng saiñpyrthei shwa ban leit pynïasoh pura sha ka National Peoples Party (NPP) kaba bat ïa u lakam synshar ha kane ka jylla ha ka sngi Saitjaiñ ha ka jingïalang ka ban sa long ha ka ophis treikam jong ka NPP ha nongbah Shillong.
Ïa ki dulir pynïasoh yn sa ïasoi hapdeng u National President jong ka NPP u Conrad Kongkal Sangma bad u President jong ka PDF, u Bah Gavin Miguel Mylliem.
U President jong ka PDF, u Bah Gavin Miguel Mylliem ha ka jingïakren bad ki lad pathai khubor hadien ba la wai ka jingïalang u la ïathuh ba ha ka jingïasoi ïa ki dulir kin sa don ruh ki kyndon ba la buh da ka PDF sha ka NPP.
Ïa ka Peoples Democratic Front (PDF) la seng ha u snem 2017 bad saw ngut ki MLA ki la jop ha ka elekshon jong ka Ingdorbar Thawaiñ ka jylla kaba la long ha u snem 2018. Hynrei arngut na ki MLA jong ka PDF ki la leit ban pynïasoh bad ka NPP.
Ha ka elekshon kaba dang shu dep long shen ha u Rymphang, 2023 ka PDF ka la lah ban jop biang ha ki ar tylli ki Seat, kata da ka jingjop jong u Bah Gavin Miguel Mylliem na Sohra bad u Bah Banteidor Lyngdoh na Mawkynrew.
Haba kylli, u Bah Gavin u la ïathuh ha kaba ïadei bad ka jingbhah shuki Myntri la ieh beit ha ka jingstad jong u Myntri Rangbah u Conrad Kongkal Sangma.