Leit shaw ka Dr. Ampareen ïa ki nong Meghalaya na Imphal kiba kwah ban wan phai ïing

85 ngut kin wan phai mynta da ka Bus bad Liengsuiñ

0

Shillong, Jymmang 05 : Ka Sorkar Jylla mynta ka sngi Thohdieng, ka la phah ïa ka Kynhun ba la khlieh da ka Myntri Sorkar Dr Ampareen Lyngdoh, sha Imphal ban ïarap ïa ki nong Meghalaya kiba sahkut ha Manipur ba kin wanphai noh shala ïing namar ka jingshyrkhei ka jingkulmar bad jingïaumsnam hapdeng ki jaidbynriew riewlum Kuki bad Meitei ha katei ka Jylla.
Kane ka Kynhun ka kynthup ïa I Kong Ampareen Lyngdoh, Bah Daniel Thangkhiew, Politcal Secretary & OSD u Myntri Rangbah ka Jylla bad u Dr Vivekanda Singh Rathore, Superintendent of Police ka West Garo Hills. Kine ki la leit mynta sha Imphal ban ïarap ha ka ban pynwan phai ïing ïa ki Nong Meghalaya.
Kat kum ka kyrwoh na ka Sorkar Jylla, ka Sorkar kala wan ïalam noh ïa ki nongshongshnong ba sahkut ha Manipur kynthup ïa 50 ngut ki samla pule na ka Agriculture University, 10 ngut ki samla pule na ka Food Techology Institute, 25 ngut ki dkhot ka kynhun ïalehkai phutbol ka Lajong Sports Club bad kiwei kiwei.
Kat haduh hynne ka janmiet, palat 25 ngut ki nong Meghalaya kila don ha lynti sha Meghalaya lyngba ka Guwahati bad kine ki la wan da ki liengsuiï bapher bapher. Nalor ki liengsuin, palat 60 ngut ki samla pule kila wan da ki bos ba la pynkhreh kyrpang ban wan sha Meghalaya.
Ka Sorkar Jylla ha ka jingïatreilang bad ka Prime Minister Office, ka Ministry of Home Affairs, DG ka Assam Rifles, ka Ministry of Civil Aviation bad ki liengsuiñ shimet, ka la shim ïa baroh ki sienjam ba shngaiñ ban pynthikna ïa ka jingshngaiñ jong ki nongshong shnong ka Jylla haba wan da kine ki liengsuiñ.
Haba kren halor ki sienjam bala shim da ka Sorkar Jylla, u Myntri Rangbah Conrad K Sangma ula ong “Ngi la wan ïalam noh ïa ki nongshongshnong ba sahkut lyngba ki liengsuiñ da ka jingïoh jingbit kyrpang, kiba kwah ban wanphai sha Meghalaya.
U Conrad ula pyntip “ïa ka kynhun ïalehkai ka Lajong la synran mynta sha ka Kad Liengsuiñ bad ngi la pyrshang kat kaba lah ban pynthikna ïa ka jingshngaiñ bad ka jingwanphai ha ka por kaba dei jong baroh ki nongshong shnong jong ngi”.
“Nga kwah ban kyntu ïa ki samla pule ka Meghalaya kiba pule ha Manipur bad ki Kmie ki Kpa ba kim dei ban khih khuslai bad ban long kiba jai jai. Ngi la ïatrei iajan bha bad ka Sorkar Pdeng bad ka Sorkar Jylla, ki bor pahara ban pynthikna ïa ka jingpynbiang ïa baroh ki jingdonkam ban wan phai ïing suk ki samla pule jong ngi bad ki Nongshong shnong” ula bynrap.
Ha kajuh ka por, ka Sorkar Jylla kala pyllait paidbah ïa u helpline number na ka bynta ki nongshongshnong kiba donkam ïa ka jingiarap. Une u helpline number u dei 1800-345-3644 bad ki nongshong shnong ki lah ban phone ïa kino kino ki jingïarap ba ki donkam.
Kumjuh ruh ki samla pule ka
Agriculture bad Food Techology ki lah ban ïakren bad u Nodal Officer Bah Remdor Dkhar (+91 98631 14387), Dr. Paul Chyne (9863089972), lah ruh ban phone ïa kino kino ki jingtip ba ïadei bad ki samla pule Doktor.

Leave A Reply

Your email address will not be published.