Shuwa ba ngin shim ïa kiwei ki sienjam ngin leit kynduh biang ïa ka Sorkar halor ka Reservation Policy: Ardent

Sohra, Jymmang 05: U Bah Ardent M Basaïawmoit ha ka sngi Thohdieng u la pynbna ba ka jingïalang ka VPP ban pynshai bad dawa pynkylla ïa ka Reservation Policy bad ban pynsahngeh ïa ka jingpyntreikam ka sorkar kan dei ha Mawkyrwat ha ka 10 tarik bad hadien ba la dep ïa kane ka jingïalang ka party kan leit ban ai biang da ka jigthoh sha ka sorkar ban dawa pynkylla ïa ka Reservation Policy bad ban pysahngeh mardor ïa ka jingpyntreikam ïa ka Roster Sestem.
“Ngin pyndep ïa ka wat kaba ar jong kane ka jingïakhih jong ngi ha ka 10 tarik bad ngin sa leit ai jingthoh biang ïa ka sorkar halor ka jingdawa jong ngi hynrei lada ka kuman gim banse ban shim da kiwei pat ki sienjam kiba kham tyngeh,” ong u Bah Ardent haba kren ha ka jingïalang ha Saitsohpen.
“Ngi dawa pynkylla ïa ka Reservation Policy bad ban pynsahngeh mardor ïa ka jingpyntreikam ïa ka Roster System hynrei ki kular hana ban khot da ka All Party Meeting hynrei shuwa ba kin lum ïa kane ki la leh buit tuh lupa bad ki khohreh ban pyndap ïa ki post ba thylli kat kum ka Roster da ki paralok Garo khnang ba ki post ba thylli yn pyndap da ki Garo katba ki samla jong ngi pat kin hap shong tyrkhong namar ka kam la bhah lut ploiñ sha ki (Garo),” u la bynrap,
U la ong ba ka jingdawa ka VPP ban pynkylla ïa kane ka Polisy bhah kam kam dei kaba ki leh khlem da pyrkhat kumba bun ki kynnoh.
“Nga kwah ban pynshai ba kito kiba ong ba lada ktah ïa kane kan tuklar ka kashari namar kan tip ba ka bhah kam ha ka jylla ka dei palat ïa ka 50% kumba bthah ka Supreme Court hynrei to tip ba ka kashari ka la tip naduh kaba sdang hynrei namar ngi dei ka jylla riewlum kane kan ym ktah eiei kumba don ba ïalam bakla,” u la ong.
“Lada dei ba kam shah ban ai bhah kaba palat 50% balei ka kashari ka ailad ïa ki seat ha ïingdorbar thawaiñ ka tam ïa ka 50% hynrei balei ka kashari kam leh eiei, ka daw hi ka dei namar ngi dei ka tribal state bad palat 80% ki nongshong shnong ki dei ki riewlum na kata ka daw ka bhah ba la ai ruh ka dei kaba shongnia shong aiñ,” u la bynrap.
Ha kane ka sngi u Bah Ardent u la pan ruh ïa ka rai na u paidbah ba lada ka party kan ïaid sha khmat ban dawa pynkylla ïa kane ka polisi bhah kam bad la ïohi ba da ki bun spah ngut ki paidbah ki la ai ka jingkyrshan ba ka VPP kan ïaid shakhmat halor kane ka bynta.