Mynjur ka Cabinet ïa ka Ordinance ban kyntiew ïa ka Contingency Fund na ka 500 klur sha ka 1000 klur

Shillong Kyllalyngkot, 20: Ka Kynhun Myntri hynne ka sngi Thohdieng ka la ai jingmynjur ïa ka Contingency Fund of Meghalaya (Amendment) Ordinance, 2024 na ka bynta ban kyntiew ïa ka Contingency fund na ka 500 klur tyngka sha ka T.1000 Klur.
Haba ïakren bad ki nongthoh khubor hadien ba la wai ka jingïalang, u Myntri Rangbah ka jylla u Conrad K Sangma ula ong, “Kane ka dei ka sienjam kaba shipor. Kumta ka Contingency Fund of Meghalaya (Amendment) Ordinance, 2024 ïa kaba yn kyntiew ïa ka contingency fund na ka T.500 Klur sha ka T. 1000 Klur.”
Haba pynshai halor kane, u Myntri Rangbah ula ong, “Ki la don katto katne ki kyndon ha ka Budgetary Provisions bad haba ki la pynlut noh ïa ka pisa kaba la mang bad katba ym pat mynjur ïa ka Supplementary Demand hapoh ka ïing dorbar thawaiñ ka jylla ngim lah ban pyndonkam ïa ka pisa wat lada ngi don ïa ka pisa ruh. Kumta lada ym ïoh ban ai jingmynjur ïa ki Supplementary Demand hapoh ka ïing dorbar lah ban pyndonkam ïa ki kyndon jong ka Contingency Fund”.
“Kumta kane ka dei tang ka kyndon ban kyntiew ïa ka jingbhah tyngka na ka T.500 klur sha ka T.1000 Klur namar ba ngi ju ïoh shuh shuh ïa ka pisa na ka Sorkar India bad ka jingïoh ïa ka bhah khajna bad kiwei kiwei ki bynta jong ka Fund na ka sorkar pdeng ka la kiew bad ngi don ha kata ka kyrdan ïa kaba ngin ïoh shuh shuh ïa ka pisa na ka bynta ki kam pynroi, hynrei ki kyndon ha ka Budgetary Provision kim pat long kiba biang ban pyndonkam ïa katei ka pisa kumta ïa kitei ki kyndon la hap ban pynkiew noh khnang ba ngin don ha kata ka kyrdan ban lah ban pyndonkam ïa ka pisa kaban wan na ka sorkar pdeng” la pynkut u Conrad.