Nongpoh, Nailar 24: Kum uwei na u Riew Rangbah na Ri Bhoi uba la ih bha ha ka kam sain hima sima bad uba la dei ruh u CEM barim ka KHADC bad u nongkyrshan ba radbah ka NPP uba la leit ruh ban pynïasoh noh sha ka NPP ryngkat u Dr. D.D Lapang, u Bah R.R Makdoh ha kane ka kynti u la shim ka rai ban un iehnoh noh na ka party NPP khlem da pynpaw ïa ki daw tynrai kaba la pynlong ïa u ban mih noh na kane ka party da kaba u la shu ai daw ba ka dei ka daw ba shimet jong u.
Kum ban pynkynmaw, u Bah R.R Makdoh, u la dei ruh uwei na u riew rangbah uba long u nongkyrshan ba radbah ka Party Congress ha ki snem ba la leit noh bad dei hadien ka jingiehnoh u Dr. D.D Lapang na ka party Congress ryngkat bad une u Myntri barim ka jylla u la leit pat ban pynïasoh sha ka party NPP ha u snem 2018.
U Bah R.R Makdoh u la dei ruh u nongkyrshan ba radbah jong u Bah Jason Mawlong, uba la jop kum u MLA na ka party PDF ha u snem 2018 bad ha kane ka kynti pat khlem da pynpaw ïa ki daw kiba u mih noh na ka party NPP halor ka nongrim kaba u la shu ai daw ba ka dei hi tang na ka daw shimet jongu.
Haba ïa kren bad ki Nongthoh Khubor mynta ka sngi ha ka ïingsah jong u ha Mawtnum, u Bah R.R Makdoh u la ong ba u la pynthikna ïa lade ba u la mih noh na ka party NPP na ki daw shi met jong u bad kumba paw katkum ki jinkren une u rangbah ha kane ka kynti un sa leit ban pynïasoh noh sha ka party UDP ha Ri Bhoi District ha kaba u ngeit ba dei tang kane ka party UDP kaba dei ka seng riewlum kaba don ka jingkyrmen ba kan wan rah ïa ka jingkylla na ka bynta ki paidbah hapoh ka jylla.
Shuh shuh, u la ong ruh nga la mih na ka party NPP halor ki daw shimet jongnga bad ngam don kano kano ka jingkynthoh pyrshah ïa kane ka party bad kumba paw pat shabar ka daw kaba u Bah R. R Makdoh u la mih na ka party NPP, ka dei halor ka jingbym mon ne hun jong u ïa ka rukom treikam kane ka party, ha kaba baroh shi katta ki la buh ïa u sha kyndong khlem da don bynta ha kino kino ki kam jong ka party.
