Mih madan ka Save Hynniewtrep Mission ha Lumshnong ban pynpaw ïa ki mat jingdawa ha khmat u Myntri Rangbah

Khliehriat, Nohprah 03 : Ha kaba kum kane ka sngi ba la wan hiar u myntri rangbah ka jylla sha shnong Lumshnong ban plie paidbah ïa ka ophis C&RD Block, ki kynhun sengbhalang na East Jaiñtia Hills District kiba hapoh ka shatri jong ka Save Hynñiewtrep Mission ba kynthup ka East Jaiñtia National Council, ka Jaiñtia Students Movement, ka Hynñiew Achik National Movement bad kiwei kiwei, ki la mih sha surok ha Lumshnong bad rah ïa ki lama bad pyrta ïa ki jingdawa ba ki la dep ban dawa na ka sorkar.
Haba kren sha ki pathai khubor, u General Secretary jong ka East Jaiñtia National Council, u bah Nangjan Dkhar u la ong ba “ Ngi wan hangne ym dei ba ngi pyrshah ïa ka jingwan u myntri rangbah bad ruh ngim pyrshah eiei ïa ka jingwanrah ïa ka roi ka kiew ha ka thaiñ, hynrei ka jingwan jong ngi hangne ka long ban pynkynmaw ïa ka sorkar ïa ki mat jingdawa kiba ka Save Hynniewtrep Mission ka la dep pynpaw, ngi ieng ha ka nongrim kaba skhem, ngi kwah ba ha shwa ban kut noh kane ka samoi treikam jong ka sorkar ngi buh ka jingdawa na ka sorkar ka MDA ba kane ka sorkar MDA ka dei ban pyndep ne pynurlong noh ïa kine ki mat jingdawa”
Utei u nongialam jong ka EJNC u la ong bad kynthoh ruh ba lada u Conrad Sangma u dei uta u ba u don ka jingktkhlieh u dei ban pyndep noh ïa ki jingdawa ngi pynbor ban pyndep ïa ki jingdawa kiba ka Save Hynniewtrep Mission ka la buh hakhmat ka sorkar.
Ka President jong ka HANM East Jaiñtia Hills Women Wing, ka kong Bythygrace Dkhar ka la ong ba “ Ka jingwan jong ngi hangne ka long ruh ban phah ïa ka khubor sha u myntri rangbah ka jylla ba u dei ban don ka jingkitkhlieh na ka bynta ka ri bad ka jaitbynriew namar kumba long mynta kum ka jaitbynriew ngi la shah leh beiñ hynrei balei kum u nongialam um shim khia ïa kane, kum ka jingjia kaba la jia ha shnong Mukroh, ngi dawa ba ka dei ban don ka jingtohkit kaba khuid ba suba, ngi dawa ruh ba dei ban buh ïa ki police outpost ha Mukroh khnang ban ïada ruh ïa ka khyndew ka shyiap, lada ka sorkar ka shu sngap jar jar bad lada ka Assam ka dang wan ban kyntur pud ka lah ban don kaei re kaei sha lyndet” pynpaw ka kong Bythygrace.
Kum ban shu pynkynmaw, ka Save Hynniewtrep Mission ka la dep ban buh khyndai tylli ki mat jingdawa ha khmat ka sorkar kiba kynthup ka jingdawa ïa ka Inner Line Permit, ban pyn rung noh ïa ka ktien khasi ha ka kyrnit kaba phra jong ka riti synshar ka ri India, ban pynbeit biang ïa ka MoU dei pud kaba beaiñ bad beriti, ban pynkynriah noh ïa baroh ki nongtrei sorkar bad beh noh mardor ïa ki khar metor kiba shong beaiñ ha them ïew mawlong, ban pynbeit thymmai bad pynbha ïa ka polisi thungkam kaba noh shiliang ha Meghalaya, ban tohkit da ka kynhun CBI lane da ka iïng kashari ïa baroh ki kam bamsap ha ka jylla, ban tohkit da ka CBI , bishar da ka iingbishar kashari ban iaid stet bad pynshitom ïa ki pulit kiba leit siat iap ïa u bah Cheristerfield Thangkhiew, ban thung kam mardor da ka lynti kaba khuid ïa baroh ki kam ba dang sag thylli ha ka jylla Meghalaya bad ban weng noh mardor ïa ka aiñ kaba khalai casino.