Shillong, Nailur 08 : Ka kynhun ki nongñiah kali sorkar hapoh ka lama jong ka Meghalaya Government Drivers Welfare Association ha ka sngi Saitjain ka la pynlong ïa ka jingleit ai snam sngewbha ne ka Blood Donation Camp ha Pasteur Hills Blood Bank, Shillong.
Ha kane ka prokram ki la don 80 ngut ki dkhot jongka Synjuk kiba lamih shakhhmat ban noh synniang ïa la ka snam hynrei kiba la ïoh ban ai snam ki long tang 32 ngut.
Na ka liang ka Kongsan, Kong VR Syiem ba dei ruh ka Secretary jong ka sorkar jylla ryngkat ka Director of Health Services (MI) Dr. FV Kharshiing nangta Director of Health Services (Research) Dr. W Kharlukhi ki la ai ka jingïaroh ïa ka sienjam ba la shimti da katei ka kynhun ki nongniah kali sorkar da ka thong ban ïarap ïa ki para briew lyngba ka snam ba ki ai sngewbha.
Katba na ka liang ka Dr. C Budnah kaba peit ïa ka Blood Bank, Pasteur, Lawmali, ka la pynkup burom ïa ki dkhot jong ka synjuk kiba la noh synniang ïa ka snam ka jong ki khnang ba kan long ka jingïarap ïa kiwei pat kiba donkam kyrkieh ha ka por ba ai ïa ka jingsumar.
Ha kane ka jingïalang la donlang ruh ki nongïalam ka Synjuk ba kynthup ïa u President u Bah C Syiemlieh bad u General Secretary Bah P Nongkynrih bad kiwei kiwei ki nongïalam bad ki dkhot jong ka Association.
