Shillong, Nailur 08 : U nongïalam ka BJP uba dei ruh u MDC ka Tura u Bernard N Marak u la ther ïa ka seng NPP kaba ïalam ïa ka sorkar jylla da kaba kynnoh ba ïa ki political appointee la ai lut sha ki bahaiing jong u (L) PA Sangma.
Kane ka jingkynthoh ka la mih hadien shisngi ba la mih ki khubor ba pynbna ba la thung ïa ka MP barim jong ka Tura bad ka para jong u Myntri Rangbah ka jylla ka Agatha K Sangma kum ka Chairperson bathymmai jong ka Meghalaya State Commission for Protection of Child Rights (MSCPCR).
Utei u nongïalam BJP u la kynnoh ruh ba wat ïa ka shuki MP Rajya Sabha ka NPP ka thmu ban ai sha ki bahaiing. Shuh shuh u ong ruh ba ka long kaba sngewsih ba watla bun kim pdiang shuh hynrei ki dang ïoh pat ban khlieh ïa katei ka kynhun kaba kongsan tam.
“Nga buh jingkylli ïalade balei tang ki bahaiing hasem ki shah thung kam hadien ba la rem elekshon. Hato dei ba duna palat ki briew kiba stad bad shemphang lane ki nongïalam kiba tbit ha ka NPP?” buh jingkylli u Bernard.
