Shillong, Ïaiong 01 : Ka Indian academy of Pediatrics (IAP) ka la pynbna paidbah ïa ka jingsdang ba nyngkong eh jong ka ïa ka “IAP KI BAAT, COMMUNITY KA SAATH” ha ka Ri India baroh kawei, Ka jingthmu ba kongsan tam jong kane ka long ban ïa kren bad ïatai sani bniah shaphang ki mat baktah ïa ka koit ka khiah ki khunlung, ki khynnah.
Kane ka long kum ka jingpyrshang ban ïateh kti bad ïasnoh lang bad ki paidbah ba bun balang ban pynphriang bad ai jingtip ba kham bniah shaphang ki jingpang ba ïadei bad ki khunlung, khynnah ha kine ki 2 snem(2024-2025), kaba long kawei ka mat treikam jong ka IAP ha kine ki snem.
Ki jingpang ba kynthup ïa ka Obesity ( jingsngaid palat) ,Measles (Niang Pyrsit) Autism, Down Syndrome bad Thalassemia (jingpang duna snam). Lyngba kane ka sienjam, ka IAP ka thmu ba ki jinghikai bad jingpynbna kiba ïadei bad ka koit ka khiah, kin poi sha baroh ki nongshong shnong bad kan long ka jingmyntoi ïa ka imlang sahlang baroh kawei .
U Dr. G.V.Basaravaja u National IAP President 2024, u kren bad ïai ban khia ba kane kalong kum kawei ka por jingïaleh (Campaign) da kaba ong “Ka Kamram ba kongsan jong ngi ka IAP, ka long ban aibor ïa ka imlang sahlang sawdong jong ngi, ban ai jinghikai da ki jingtip ba ïar bad ba janai shaphang ka koit ka khiah ki khunlung khynnah. Namar ka Jingtip bad jingstad ka long kum ka jingkieng ban sngewthuh shaphang ki jingpang bad kumno ban ïaleh bad tehlakam ïa ki, bad da kaba leh kumne,khatduh ngin lah ban ai ka lawei ba suk, bad ba koit ba khiah ïa ki khun ki kti jong ki.
Ha ka sngi World Autism Day, u Dr Vasant Khalatkar (National IAP President 2025) u kwah ïa ngi ba ngin ai jinghikai ba kyrpang ban pynphriang bad pynsngewthuh shaphang ka Autism Spectrum Disorder, da kaba ban khia, ba “Ka jingtip shaphang ka Autism, ka jingai jingsumar ha ka por ba biang bad ba dang lung ka long ka mat bahalor tam na ka bynta ka manbha manmiat jong kiba shah ktah ha kane ka jingpang.
Ka jingthmu ba kongsan jong kane jingïaleh ka long ban ai jinghikai, ban Aibor ban ïarap lang ïa ka imlang sahlang, kumno ban ithuh bad ai jingkyrshan ïa u/ka khynnah ba shah ktah ha ka AUTISM.
Ka mat ba kyrpang jong ka IAP shaphang ka AUTISM ka long ban pynsngewthuh ïa ki paidbah shaphang ka AUTISM, bad pynshlur kumno ban im adkar bad kumno ban pynsngewthuh shaphang ki jingngeit bieit shaphang ka Autism.
Te kumta, Ngi khot ngi wer sngewbha ïa phi iwei pa iwei ban ïasnoh kti lang ha ka ban ai jingsumar bad jingkyrshan ïa u/ka khynnah ba shah ktah ha ka AUTISM, khnang ba ma ki ruh kin ïoh lang ïa ka lawei ba phyrnai.
