Shillong, ïaïong, 01: Ka United Hynñiewtrep Movement (UHM) ka la pynrem jur ïa ka jingkynthoh bad jingkynnoh ba khlem nongrim jong ka Coordination and Welfare Com-mittee (CWC) pyrshah ïa ka KSU halor ka jingshah pynïap klep ki arngut ki bar jylla ha Ichamati ha ka janmiet jong ka 27 tarik, Lber, 2024.
Ha u kyrwoh ba la phah da u President ka UHM Bah Charlie J Rani, u la ong, “ka seng ka maham jur ïa ka CWC ban shu padiah khlem nongrim ïoh lyngba kane ka jingpadiah kulmar kane ka CWC kan poi pynban sha ka thma kaba heh.”
“Ka seng ka sngew ban buh jingkylli na ka Sorkar Jylla hato kito ki mynder kiba shim ïa ka jingim jong u Bah Lurshai Hynñiewta (bam kwai ha dwar U Blei) ki lah shah pynsajia neem katkum ka aiñ nalor ba la tip thikna ba dei ma ki kiba leh ïa ka kam bymman. Hato ka Sorkar ka la ïohkem neem ïa u Vicky Dey uba la byrngem ïa ka KSU kumjuh ïa ka jaitbynriew Hynñiewtrep ban pynïap klep ïa ngi,” la ong une u nongïalam ka UHM.
“U kyrwoh ba shai lyngba ka UHM sha ki bar jylla bad khamtam kane ka CWC ba wat pynbor ïa ngi ki dkhot ka jaitbynriew Hynñiewtrep ba ngin shim ïa ki sienjam ba tyngeh lyngba kane ka jingtei pop ïa ka KSU bad kumjuh ïa ki dkhot ka jaitbynriew jong ngi haba ka aiñ ka don ban bishar sngewbha wat padiah kulmar,” la maham u Bah Rani.
Haba maham ïa ka Meghalaya Linguistic Minority Forum (MLMF) ka UHM ka la ong “ka Meghalaya Linguistic Minority Forum ka dei ban sangeh mardor halor ka jingthmu ban shong kyllaiñ myngor ha Khyndailad namar kane kan long pynban kumba theh umphniang ïa ka ding ba dang klang mynta bad lada ka Sorkar kan ailad ïa kum kine ki jingthmu jong ka MLMF kan sa poi sha ka jingïapher jaitbynriew bad kan sa mih ruh ka jingïapyni bor bad lada jia kano kano ka jingjia ba sngewsih lyngba kane ka Sorkar kan hap shim hi ïa ka jingkit khlieh.”
Ka Seng ka pynrem jur ïa ka Sorkar Kmie halor ka jingpyntreikam ïa ka Citizenship Amendment Act (CAA) bad kumba ka jaitbynriew hi baroh kawei ka pyrshah kumta ka Seng ruh kan ïai pyrshah ïa kane ka aiñ ïakjakor. Ka Seng ka dawa ba ka Sorkar Jylla ka dei ban shimkhia ïa kane ka mat ban pynsngew ruh sha ki tyndong shkor jong ka Sorkar Kmie ba kam dei ban pyntreikam ïa kane ka aiñ hapoh ka Jylla Meghalaya ba ha ka jaka jong kane ka dei ban pyntreikam noh mardor ïa ka Inner Line Permit (ILP), ka jingpynrung ïa ka ktien Khasi ha ka Khyrnit Baphra jong ka Riti Synshar ka Ri India bad ban pynthikna ïa u pud u sam uba biang.
