Mih bun ki jingkynthoh pyrshah halor ka jingthmu jer kyrteng Bharat ïa ka India: PT Sawkmie

Shillong, Nailur 0 7 : U Bah P.T Sawkmie, MLA barim u la ong ba ka ishu ban pynkylla kyrteng iaka India kum ka Bharat, kaba la mih ha khlieh duh ha ki kot khubor ha ka nongbah hynne ka sngi ka la pynlong ban mih bun ki jingkynthoh pyrshah ha ka jylla bad wat ha ka ri baroh kawei.
“Kum ki nongshong shnong jong ka ri ngi khmih lynti ba ka kyntien India ka dei ban ïaineh ha ka ri, namarba kum ki nong India ngi ieit ïa ka ri,” ong u Bah Sawkmie
U la ong baka kyntien India ka dei Bharat bad Bharat ka mut India. “Shuh shuh ha ka kyntien phareng (English) ngi khot ka riti synshar jong ka India bad ha ka Hindi ngi khot Bharat ka samvidhan,” u la bynrap.
U pynpaw ruh baka article 1 jong ka riti synshar ka India ka ong, India ka dei Bharat, kumta lada ngi pynkylla ia ka kyrteng sha Bharat, baroh kiei kiei kin hap ban pynkylla bad kan ktah ïa ka jinglut jingsep kaba ki nongsiew khajna kin hap ban siew.
Shuh shuh ngi hap ban thoh biang sa shisien ïa ka history, ha kum kane ka por baroh kawei ka ri ki ithuh ia ka sorkar India. Bun ki jingeh ba ki paidbah ka ri kin mad, u la ong shuh shuh.
U ong ruh, ka sorkar BJP kaba synshar ha Delhi kan ym ïoh jingmyntoi ei ei na kane ka jingpynkylla ïaka kyrteng, hynrei ki lah ban duh pynban ïa ka jingkyrshan na ki paidbah ka ri.
Shimet baroh ki seng sain hima kiba ïa synroplang kiba don ha ka liang pyrshah kim dei ban ai kyrteng I.N.D.I.A, kata ruh ka wanrah bun ki jingkulmar ha ka jingmut jingpyrkhat jong ki paidbah ha ka ri.
Lada ngi pynkylla ïa ka kyrteng sha ka Bharat, ngi hap ban pynkylla ruh ïa ki pisa, Reserve Bank of India sha ka Reserve Bank of Bharat, pynkut u bah Sawkmie haba kren sha u nongthoh khubor.