Shillong, Nailur 7 : U Nongaibuit jongka tnad pule puthi u bah H.M Shangpliang u la ong mynta ka Sngi Palei ba ka sorkar ka la pynkhreh ki lad ki lynti ban ym pynslem shuh ban siew ïa ka tulop jongki 12,000 ngut ki nonghikai SSA ha ka jylla.
“Ngi la thaw ki lad ki lynti ban pynthikna ba ki nonghikai SSA kin ym mad shuh ïa ki jingeh na ka daw ka jingslem ban ïoh tulop” ong u bah Shangpliang haba ïakren bad ki lad pathai khubor.
U la ïathuh ba ka Meghalaya SSA School Association (MSSASA) dang shen ki la pynlong ïa ka jngïalang ban pynpaw ka jingsngewnguh ïa ka sorkar kaba la shim khia ban peit ïaki jingeh jongki.
“ Ki nonghikai MSSASA ki long kiba kmen namar ka sorkar mynta ka pynkhreh ban pyllait ïa ka arrear jongki. ïa kane ka Arrear la dei ban pyllait naduh ka por Khristmas hynrei dang ïoh ban pyllait mynta bad kum kane kim pat ju ïoh ha ki snem kiba la dep” ong u bah Shangpliang.
U bah Shangpliang u la ïathuh ba ka sorkar ka dang pynkhreh ruh ban thung ïa ki 1200 tylli ki post nonghikai ha ki skul Primary. “ Ngi la rai ban thung ïa ki samla kiba la dep pyndep iaka Meghalaya Teachers Eligibility Test (MTET) ha kine ki post ba thylli” ong biang u bah Shangpliang.
U la ïathuh ruh ba ka sorkar ka la shim ïaki lad ki lynti kumno ban rah bad kyntiew ïa ka jingpule puthi ha ka jylla khnang ba kan ym sahdien haba ïanujor bad kiwei ki jylla ha ka ri.
