Markhmat bad u Myntri Civil Aviation kyrpad u CM na bynta ki projek kad liengsuiñ ha Meghalaya

Shillong, Naitung 22 : U Myntri Rangbah ka Jylla Conrad K Sangma ha ka sngi Baa r u la ïa kynduh ïa u Myntri ka Sorkar Pdeng ba khmih ïa ka Tnad Civil Aviation, u Kinjarapu Rammohanan Naidu ban pan ïa ka jingkyrshan ka sorkar Pdeng ban pyntyllun shakhmat ïa ki project kad liengsuin da ka jingthmu ban pynkhlain ïa ki lad pynïasoh lyngba ki liengsuin ha kylleng ka Jylla Meghalaya.
Katkum ka kyrwoh, la ïathuh ba ka bynta kaba hakhmat eh ka dei ka jingpynheh ïa ka Shillong Airport ha Umroi. Halor kane ka bynta ka Jylla ka la aiti ïa ka jaka ba 22 akar sha ka Airport Authority of India (AAI), ha kaba ki environmental clearance ki la don, bad ka AAI kala aiti ïa ka kam ban pyntrei ïa ka jingpynheh ïa ka surok liengsuin ne ki runway.
Ka jingdon jong ka surok liengsuin ba kham jrong kan ailad ïa ki liengsuin ba kham heh kum ka A320 ba kan wan shakri, plie ïa ka lad ban pynïasoh ïa ki liengsuin beit beit sha ki sorbah bad pynduna ïa ka jingshanïah ha ka jingïaid lynti kaba jngai lyngba ki surok na Guwahati.
U Myntri Rangbah u la Kyrpad ruh ïa ka Directorate General of Civil Aviation (DGCA) ban ai ïa ka jingbit ban pyntrei kam noh khnang ban lah sdang noh ïa ka kam ba la aiti ban pyntrei bad weng ïa ki jingwit ha ka jaka ïaid ki liengsuin. La ong ruh ba ka Jylla ka la pynlut nalade ban pynkhuid ïa kine ki jingwit, kynthup ka jingpynkynriah ïa ka shnong Umden Mission kaba kot 150 klur, bad ka la pynskhem ïa kane ka jingkular hakhmat ka Iingkashari High Court ka Meghalaya.
Na ka bynta ka ri-lum Garo, ka Jylla ka la kyntu ïa ka AAI ba kan shimti ban pynïaid ïa ka Baljek Airport ha Tura kum ka kad liengsuiñ ba pura jong ka AAI, haba tyrwa ban kynshew nalade ïa ka jinglut jong ka projek ba kot sha ka 63.67 klur tyngka.
Ïa kane ka kad la tyrwa ban pynïaid da ki bynta bynta, kaba sdang da ka liengsuin ba 19 seat bad jam sha ka ATR-72 bad A320.
U Myntri Rangbah ula pan ïa ka jingbei tyngka lyngba ka Regional Connectivity Scheme (RCS-UDAN), ha kaba yn sa pynphai pat ïa ka jingkynshew tang mar ïa ïoh ïa ka jingmynjur ïa ka projek.
Shuh shuh la ïathuh ba artylli ki helipad ha Shillong bad Tura lah dep ban mang pisa bad ki la don hapdeng ka jingpyntrei ia ki kam. Ka Jylla ka la ithuh biang sa ïa khyndai tylli ki jaka ha ki district Headquarter bad ki jaka jngohkai, bad pan ïa ka jingbei tyngka ïa kumba artylli napoh ka RCS-UDAN ryngkat bad ki jingwad bniah ïa ka jinglah ban pyntrei ïa ki kam jong baroh ki project.
Hadien ka jingjop ka jingpyni ïa ka jing treikam ki liengsuin duriaw ba la pynlong ha pung Umïam ha u bnai Naiwieng 2024, ka Jylla k ala pan ruh ïa ka jingbei tyngka ïa ka water aerodrome ha Umïam hapoh ka RCS-UDAN bad ka jingpynkhreh ïa ka detailed project report, kaba tyrwa ïa ka Umïam kum kawei na ki san tylli ki aerodrome kaba la bynshet ha ka AAI ba kan pyntrei.