Mar syn mih ki MLA na ka TMC, thang ki nong kyrshan ïa ki WECard, MYECard
Mih paidbah bad pyrta “khie phet noh TMC”
Tura, K’lyngkot 19: Ha ka sngi ba ki arngut ki MLA jong ka Trinamool Congress, u Jimmy Sangma bad u Marthon Sangma, ki la mih noh na ka Party, namar ka jingshah pynduh ticket, ki nongkyrshan jong ki, ki la mih paidbah sha surok bad thang ruh ïa ki jingïarap ba la ïoh na ka Party.
Kane ka la jia ha ki katto katne ki jaka jong ki Constituency ba kine ki MLA ki mihkhmat.
Ha ka jingpynbna kyrtong ka TMC, na Tikrikilla un ïakhun hi u Dr. Mukul Sangma, katba na Mendipathar ba la mihkhmat da u Marthon Sangma ka Party ka la pynïeng ïa u Pardinand D. Shira.
Ki khubor ba la saphriang lyngba ki rynsan Social Media, la ïathuh ba ki paidbah ki la bitar ïa kane ka jingpynduh ticket ka TMC ïa kine ki arngut ki MLA kiba la mih noh ryngkat bad kiwei pat ki 10 ngut ki MLA na ka Congress sha ka TMC.
Shuh shuh la ïathuh ba ki paidbah nongkyrshan jong kine ki arngut ki MLA, ki la bitar naduh ka sngi ba pynbna kyrtong ka TMC ha ka 6 tarik mynta u bnai, hynrei ki la ap kmang ïa ka sngi ba ka nongseng jong ka TMC ka wan sha Garo Hills, ka Mamata Banerjee ryngka u General Secretary, u Adhishek Banerjee kata hynnin ka sngi, bad ha ka por mynmiet ki lamih buk sha surok ryngkat ka jingpyrta “Go Back ..Go Back TMC”, lane “khie phet noh..khie phet noh TMC”.
Hadien kane ki la lum la lang ïa ki tiar ki tar ba la ai da ka Seng kum ki sopti banian, ki WECard,kaba dei ka Card ban ai jingïarap 1000 tyngka shi bnai ïa ki Kynthei bad ki MYECard, kaba dei ka Card ba ai jingïarap 1200 tyngka shi bnai sha ki Samla bad kiwei kiwei de ki jaiñ ba la ïoh na ka Seng kum ka dak ban pynjem daw ïa kame ka Party ba la ïalam da u Dr. Mukul Sangma.
La sngewthuh ba kine ki arngut ki MLA kin leit ban pynïasoh noh sha ka Seng NPP ba la ïalam da u Conrad Sangma.