Shillong, K’lyngkot 19 : Ka Media Coordinator jong ka All India Congress Committee (AICC) ka Bobeeta Sharma ha ka sngi Palei ka maham ïa ki seng kiba treilang bad ka BJP naduh ka NPP bad ki seng riewlum kum ka UDP, PDF, HSPDP, ba ha kawei ka sngi kin sa shah nguid ha ka seng BJP bad ba ka BJP kan knieh noh ïa ka jaka jong ki ha ka saiñ pyrthei jong ka jylla kumba ka la leh ha kiwei ki jylla jong ka ri.
Haba kren sha ki lad pathai khubor ka Bobeeta ka la ong ba ka BJP haba ka sngewthuh ba kan ym lah ban jop elekshon da lade bunsien ka bsuh khlieh suki suki da kba sdang shuwa ban ïatreilang bad ki regional party bad ynda ka sngewthuh ba ka la khlaiñ bor kan sa nguid ïa kine ki party kiba rit ban bujli da lade ha ka kam saiñ hima jong ki jylla.
“Ha Assam ha kaba nyngkong ka BJP ka dei tang ka nongïatreilang bad ka Asom Gana Parishad (AGP) hynrei ynda ka sngewthuh ba ka la khlaiñ bor ka shim ha lade suki suki ïa ka jaka kine ki regional party bad nguid syndon ïa ka ha kaba mynta ka AGP ha Assam ka la jan dam syndon na ka saiñ hima sima ha Assam,” ka la ong.
“Phin peit ha Maharashtra ka BJP ka la klun ïa ka Shiv Sena, ha Bihar ka la jan ïoh nguid ïa ka Janata Dal (United) ha Bihar, ka ïoh ban pharia ruh ïa ka All India Anna Dravida Munnetra Kazhagam (AIADMK) ha Tamil Nadu bad kane kan jia kumjuh ïa ki seng saiñ pyrthei ba ïatreilang bad ka BJP ha ka jylla,” bynrap lang u Matthew Antony.
Ka Bobeeta ka la ong ruh ba lada wan na Guwahati marsien rung ha ki bynta ka jylla Meghalaya la ïohi ba satah tang ki poster ka BJP la kumba dei ka BJP ba synshar ïa ka jylla.
Ka Bobeeta ka ong ba ka Congress ha ka por ba ka synshar ïa ka ri haba ka ïatreilang bad ki regioal party kam pat ju pyrshang ban nguid ïa ki hynrei ka ailad ïa ki ba kin nang san namar ba ka Congress ka sngewthuh ba ka long kaba kongsan ban don ïa ki regional party.
Haba kynthoh halor ka jingtreikam ka sorkar MDA ka Bobeeta ka la ong ba wat u Presient ka BJP Meghalaya, u Bah Ernest Mawrie dalade u la kren sha ki lad pathai khubor ba ka Sorkar MDA ka dei ka sorkar ba bamsap wat la ka BJP ka dei shi bynta bad ka sorkar MDA ruh.
“Phi lah ban pyrkhat hangne ba lada ka paralok ba ïatreilang ka ong baka sorkar ka dei kaba bamsap hynrei ha kajuh ka por da kaba burom ïa u Bah Ernest, u la khot ïa ki nongthoh khubor hynrei um shym la nud pat ban leh kat kum ka jingkren,” ka la ong.
