Mar ia hiar na bos, pynbna u CM ban phah maramot noh ïa ka surok bad ka skul ha shnong Siej

Shillong, K’Lyngkot 12 : Ka shnong Siej, ka nongrit kaba pawnam na ka jingdon ïa ka jingkieng jri kaba la pynwandur kham phylla kum ka jingkieng ïaid kai ha suin, ka la ïoh ïa ka jingkular na u Myntri Rangbah ka Jylla Conrad K Sangma ba kin sa ïoh shi khung ki jingmyntoi na ka bynta ban kyntiew ïa ka roi ka pa ha katei ka shnong.
Ïa kane la kular hi da u Myntri Rangbah ha ka sngi Saitjaiñ ha ka jingleit ban jurip ïa kane ka shnong kaba don ha Shella – Bhologanj Block.
Kane ka jingleit jurip kadei hadien shisngi ba ka sorkar ka la pynlong ïa ka jingïalang ba nyngkong eh jong ka Kynhun Myntri ha Sohra ha kane ka sngi Thohdieng.
Na ka liang u Myntri Rangbah hadien ba u la ïoh pdiang ïa ka dorkhas na ki nongïalam shnong hapoh ka jingïalam jong u Bah Macdonald Khyllep ba dei Sordar ka Nongkroh kumjuh na u Bah Hally War Rangbah Shnong ka Siej u la kular ba ka sorkar kan sa shimkhia ban peit ban sa maramot noh ïa ka surok kaban poi sha katei ka shnong bad kumjuh ruh wat ban pynbha ïa ka skul shnong.
“Naduh ba ngi don ha ka bos ban poi shane ngi la dep rai lypa ban phah shna pynbha noh ïa kane ka surok,” ong u Myntri Rangbah. Haba ïadei pat bad ka jingshna ia ka iing skul u la pyntip ba kumba ki la phah pynbha lut ïa ki skul Lower Primary jong ka sorkar kumta ruh kin sa phah pynbha noh ïa ka skul sorkar kaba don ha kane ka shnong.
Halor ka jingkyrpad ban pynpoi surok na ka bynta ban pynsuk ïa ki nongrep ha katei ka thaiñ u Myntri Rangbah u la kyntu ïa ki ophisar ka tnad PWD ba kin wan jurip bad shimkhia halor kane ka bynta.
Nangta, haba ïadei pat bad ki jingïarap na ka bynta ban kyntiew shuh shuh ïa ka kam jngohkai pyrthei, u Myntri Rangbah u la bthah ïa u Director ka tnad Tourism ban leh ïa kaba donkam da kaba buh hakhmat pat badei ban pynneh ïa ka jinglong kyrpang jong ka thaiñ khamtam haba ïadei bad ka jinglong ka mariang.
Watla bun kim pat da tip than shaphang ka shnong Siej hynrei kane ka shnong ka don ïa ka jingkieng jri kaba itynnad bha kaba ju tip kum ka Umkar Living Root Bridge kaba la thaiñ bad pynwandur itynnad bha da u Bah Hally War.
La ïathuh ruh ba u Bah Hally War u la sdang ban shna ïa kane ka jingkieng jri naduh ba u dang don kumba 10 snem eiei hadien ba u la ïohi ïa ka jingeh ba ki paidbah ki shem jingeh ban kam sha shilliang ka wah ha ka por Lyiur.
Ïa kane ka jingkieng suin ba shna da ki diengjri la pynpaw pyrthei shuh shuh da ka jingleit jurip hi u Myntri Rangbah ka Jylla Conrad K Sangma ryngkat ki Myntri Sorkar kynthup naduh ka Myntri ka Koit ka Khiah, Dr. Ampareen Lyngdoh, Myntri ka tnad PHE Marcuise N Marak nangta u Chief Secretary ka jylla Bah DP Wahlang nalor kiwei ki heh sorkar, ki bor distrik bad ki nongïalam shnong.