Shillong, Nohprah 08: Ka sorkar jylla ka la dep mang kumba T. 950 klur sha ka Meghalaya Energy Corporation Limited (MeECL) ha ka shisnem ba la leit.
Ïa kane la ïathuh da u Myntri ka tnat bording u AT Mondal haba jubab ïa ka jingkylli da ka Association of Power Engineers (AOPE) kaba la ong ban pyrshah lada ka MeECL kam lah ban pynbeit ïa ki jingeh jong ki ha kaba ïadei bad ka kam diploma cadre.
“Ngi sngew ba ïa ki jingeh jong ki dei ban pynbeit hynrei ha kajuh ka por pat ngin hap ruh ban peit ïa ka jingduna jong ka pisa jong ka MeECL. Kine baroh ki dei ban ïaid lang. Ngi long ruh kiba kloi ban peit ïa kine ki jingeh hynrei ngi hap ruh ban khmih ïa ki jingeh kiba don hapoh ka MeECL,” ong u Mondal.
U la bynrap ruh da kaba ong ba kane ka dei ka kam jong ka MeECL bad la kyrmen ba ka MeECL kan sa lah ban pynbeit ïa kine ki jinglong jingman.
Haba ong ba ka MeECL ka donkam ban sngewthuh ia kane ka jinglong jingman, u Myntri ka tnat bording u la ong, “Manla ka snem bad tad haduh kane ka sngi ka sorkar ka ai ka jingïarap pisa sha ka MeECL ba kan lah ban pynïaid ïa ki kam.”
“Lah jan T. 24 klur ngi la pynlait na ka bynta ban siew ïa ka bai tulop bad kumba T. 12 klur ka bai bam tymmen bad phi lah ban ong ba manla ka bnai ka pisa ka tyllun kumba T. 40-50 klur. Lada phi kheiñ kane ka la dei ka pisa kaba heh bha bad ha u snem ba la dep ka tnat ka hap ban ai kumba T. 950 klur,” u la bynrap.
