Shillong, Nailar 29: U Advisor ka tnat pule puthi ka sorkar jylla u bah H. M Shangpliang ula ïathuh ba ka sorkar MDA ka la shim bun ki sienjam na ka bynta ka bha ka miat ki nonghikai SSA bad shen kan sa pyllait ïa ka song pisa kaba T.52 klur ban siew ïa ka tulop ki nonghikai SSA.
Haba kren sha ki lad pathai khubor hadien ba wai ka ‘Conference cum Felicitation Programme jong ki nonghikai SSA’ u bah Shangpliang ula ong ‘Ka jingpynkhreh ïa ka tulop na ka bynta ki nonghikai SSA ka la ïaid shakhmat. Ka File ka la ïaid na ka tnat Pule bad hadien ba la mynjur da ka sorkar ngin sa lah ban pyllait ïa ka song pisa ba T.52 klur naka bynta ki nonghikai SSA’.
U bah Shangpliang ula ïathuh ba nalor ka T.52 klur ka sorkar ka la kular ban pyllait ïa ka Installments jong ki Arrears ba dang sah.
“Iaka Arrears ba nyngkong la pyllait ha u bnai Jylliew bad iaka Second Installment la pyllait mynta u bnai bad ka jingpynkhreh ban pyllait biang iaka tulop ba dang sah ka dang iaid shakhmat” ula ong.
Nalor kane u bah Shangpliang ula ong ruh ba ka sorkar kan ïai trei naka bynta ka bha ka miat ki nonghikai SSA hynrei ka sorkar ka kwah ruh ban ïohi ba ka pule puthi kan kiew bha ha ki skul SSA ha ki snem ban wan.
