Nongstoiñ, Nailur 6: Ka Hynñiewtrep Youth Council Maweit Circle, ka la maham ban leh da kaba tyngeh ïa baroh ki briew kiba kit bad shalan masi beaiñ na surok Nongstoiñ-Maweit.
Katkum ka kyrwoh na u General Secretary samla Shemphang Tyrsa, la pyntip ba ka HYC ka la buh mynta ïa ki volunteer ki ban pahara ha shilynter ka surok Maweit, ki ban kem lada lap ïa ki briew kiba khaïi masi beaiñ na ka thaiñ.
Ka seng ka la kren shai ba kan kem ïa kiba shalan masi beaiñ bad kan aiti sha ki bor ka aiñ. Ha kajuh ka por, ka Seng ka la dawa ïa ki bor District ba kin peit bad ban phah pahara bha ha kane ka surok, ban teh lakam ïa ki nongkhaïi masi beaiñ, khnang ba ki paidbah kiba ri jingri ha ka thaiñ kin ym sheptieng na ka jingpang snieh doh (lumpy skin) ban ïabit ha ka thaiñ.
