Shillong, Kyllalyngkot 06: Ka Shillong Lajong FC ka la ïohlad ban pynurlong ïa kawei na kiba bun tylli ki kabu ksiar kiba ka la thaw ban khur ïa ka jingjop kaba kongsan da 1-0 kol pyrshah ïa ka Nongrim Hills SC ha ka jingïalehkai ka lympung OC Blue Shillong Premier League 2024 ha madan First Ground – SSA Stadium, Polo, hynne ka sngi Nyngkong.
Ka dei ka jingïalehkai kaba la sakhi ïa katto katne tylli ki kabu ksiar kiba la pynsyrwai kai na baroh arliang mamla hynrei u Deibormame Tongper (89’minit) u la thep katei ka namtam ha kaba khadduh ban khur shalade ïa ki 3 poiñ na ka bynta ka Lajong.
Lah ban kdew ba kane ka dei ka jingïalehkai kaba nyngkong ïa ka Lajong ha ka OC Blue SPL hadien shi-bnai bad ka la kyntiew ïa ki sha ka 16 point na ki hynñiew tylli ki jingïalehkai. Katba ïa ka Nongrim Hills, kane ka jingïalehkai ka dei kaba khatduh ïa ka ha ka wat kaba nyngkong (first leg) bad ka la pynkut noh ïa ka jingjop kaba lai sien lynter jong ka klob; naki 9 tylli ki jingïalehkai ka la ïoh ban khur jingjop 4 sien, ïakhaid shi sien bad 4 tylli ki namrem ban kamai baroh 13 point ha ka miej.
Ka khyllipmat kaba kongsan ha ka kylla step ka la wan ha kaba kut da ka jingïakynad hapdeng ki player jong kine ki ar kynhun kaba la pynlong ïa u referee ban sei bad ai saw tylli ki yellow card – ar tylli na bynta kawei pa kawei ka kynhun. Hynrei dei ka jingïalehkai ha ka kylla miet ba la sakhi ïa kiba bun tylli ki kabu ksiar kiba la pynsepei na baroh arliang mamla.
U Deibormame u la ïoh ym duna ïa lai tylli ki lad kiba paka ban pynkhihjar ha kane ka jingïalehkai ban thep ïa ka kol ha ka kylla miet shuwa ban pynurlong ïa ka namtam ban ïoh ïa ka jingjop.
Nyngkong, ka bol ba la pyndei tiak da ka khlieh ka la wan beit beit sha u nongapkol ka Nongrim Hills u Urbanity Makhroh, uba la khanglad ïa ka da ka kjat shwa ban bat noh ïa ka bol ba la pynphai biang ha ki kti jong u. Hadien katto katne minit kine ki arngut ki la ïakynduh biang, ha kane ka por u Deibor u la ïohpdiang ïa ka bol pashat hynrei u Urbanity u la pynkhim ïa ka jaka da kaba mareh pynstet shakhmat bad ïada ïa ka jingpyrshang da ka met jong u. Ha ka 76 minit une u rangïalehkai ka Lajong (jersey No. 9), u la pynsepei da kaba lait sharud ban thep ïa ka bol ba la pashat hapoh phyllaw bol na bynta jong u.
Hapdeng kine baroh, ka Nongrim Hills ruh ka la ïoh ban wanrah jingma katto katne sien, ha kaba ki bol pashat na ka liang kadiang na u Alem Khongwir ba la pynrung beit beit shapoh phyllaw kol ki la long ka jingma kaba khraw hynrei ki paralok jong u ki la shah kyntait arsien bad ka kabu kaba lai la ïohi ba arngut ki nongïalehkai ka Nongrim Hills ki la ïa tyngkhuh katba ki dang pyrshang mareh sha ka bol.
Ka la don ruh ka jingsepei ban thep kol na ka bynta u Banshemphang Kurbah ka Nongrim Hills ha ka minit kaba 80 bad sa kawei pat na ka bynta u Emanbha Marbaniang ka Lajong ha ka minit kaba 88.
Hynrei tang shi minit hadien kane ka jingïalehkai kaba itynnat, ka SLFC ka la ïoh ban rah pynstet kyndit kyndit ïa ka bol na liang kadiang ban pashat ïa ka bol hapdeng sha u Deibor ha kaba u la kynjat sani ban pynpar sar na madan shapoh kol, ryngkat ka durkhmat kaba don jingkyrmen katba u dang lehkmen hadien katei ka kol.
Ka jingïalehkai ha kane ka sngi Hatmajai (07 tarik, Kyllalyngkot 2025) yn sakhi ïa ka Nangkiew Irat SC ka ban aireng pyrshah ïa ka Rangdajied United FC ha ka por 2 baje nohphaisngi. Baroh arliang ki la ïa ryngkat mar 12 poiñ, watla ka Rangdajied ka don ka jingïapher kol kaba kham bha (+9 la -1) bad sa ar tylli ki jingïalehkai ha kti.
