Lyngba ka YESS Meghalaya, pynkup bor u Conrad Sangma ïa ki samla ka rilum Garo

0

Shillong, Nailar, 13: U Myntri Rangbah ka Jylla u Conrad K. Sangma ha ka sngi Thohdieng u la pynbna paidbah ïa ka YESS Meghalaya, Youth Engagement lyngba ka Empowered Youth Organisations programme ha rilum Garo ha ryngkat ka jingsakhi lang jong ki MLA kiba kynthup ïa u Thomas A Sangma bad u Marcuise Marak.
Ka YESS Meghalaya ka thmu ban ïarap ïa ki samla da kaba ai jingïarap ïa ki kynhun seng samla khnang ban pynthikna ba kin kham kiew ha ka imlang ka sahlang. Kane ka mishon ka long ban pynkupbor ïa ki samla khnang ba kin wanrah ïa ki jingkylla hapoh ka imlang ka sahlang.
Haba kren kum u Kongsan, u Myntri Rangbah u la ïathuh ba ki don 300 tylli ki seng samla kiba la pynrung kyrteng ha baroh kawei ka Jylla kiba trei ha ki shnat bapher bapher bad kane ka Sorkar kaba mynta lyngba ka YESS Meghalaya kan sa ai jingïarap pisa ïa ki.
Ha kane ka sngi, haduh 61 tylli ki kynhun na ki san tylli ki district ka rilum Garo ki la ïoh jingkyrshan pisa.
U Myntri Rangbah u la aiti ruh da ki Cheque sha ki nongjop ha ka Meghalaya Games 2022, kaba la long ha nongbah Shillong dang shen.
“Bun ki seng samla kiba trei na ka bynta ka roi ka par, ka jingïatreilang na ka bynta ki samla hynrei ka dang donkam pat ïa ka jingai mynsiem ïa ki samla. Ka dei ka kamram jong ka Sorkar ban pynkupbor ïa ki khnang kin dup lah ban nang kiew irat shaphrang,” u la ong.
Lyngba ka YESS Meghalaya yn sa ai jingïarap pisa haduh T.1 lak sha ki club bad ki organisation jong ki seng samla kiba ladep pynrung kyrteng ha baroh kawei ka jylla khnang ba kin dup lah ban pyntyllun ïa ki kam kiba ïadei bad ka jingïada ïa ka mei mariang bad ban pynlong ruh ïa ki jingïamir jingmut.
Ka jingïarap pisa ha kaba pynlong ïa ki jingpynshai paidbah. Ban pynshai sha ki para samla na ka jingma jong u drok, ka jingshongkha khynnah lyngba ki jingïamir jingmut.
Ka jingai jinghikai ha ka wadkam wadjam. Ka jinglum lang ïa ki para samla kumno ban ïashim bynta ha ki prokram bad ki kam bapher bapher. Ban wer ïa ki para samla kum ki nongïatreilang, ban pynlong ïa ki lympung jong ki samla bad ki jingïa tyrko. Ban thied ïa ki tiar ki tar, ban buh ïa ka ophis treikam.
Ha kane ka sngi ba la rakhe ruh ïa ka International Youth Day, la ai jingïarap pisa T. 69.6 lak sha ki 61 tylli ki seng samla jong ka rilum Garo.
Lah ban kdew hangne ba ka jingpynrung kyrteng ha ka Yess portal la plie bad ïa ka jingïarap pisa yn sa pyllait manla ka por sha ki seng samla hadien ba la bishar bniah ïa ki aplikeshon ba la ïoh pdiang ha ka Portal.

Leave A Reply

Your email address will not be published.