Shillong, Risaw 26 : Ka District Legal Services Authority (DLSA), Shillong ha ka sngi Nyngkong ka la plie paidbah ïa ka Permanent Legal Aid Clinic ha Community Hall ha shnong Khrang kaba hap hapoh ka Khatarshnong-Laitkroh C&RD Block.
Kane ka prokram ka long shi bynta jong ka jingpynkut ïa ka jingtrei kaba 60 sngi, kaba la tip kum ka 60-Day Mega Drive.
Ha kane ka prokram la wan donlang ruh ka Kong D.R. Kharbteng, District & Sessions Judge bad Chairperson jong ka DLSA, Shillong kum ka Kongsan, nangta u Bah W. Kharbuli, Block Development Officer jong ka Khatarshnong-Laitkroh C&RD Block; ka Kong B. Kharlukhi, Secretary jong ka DLSA, u Rangbah Shnong bad u Secretary ka shnong Khrang, ryngkat bad ki paidbah nongshong shnong.
Haba ai jingkren, ka Kong D.R. Kharbteng ka la ban jur ba ym dei ban pynduh ïa ka hok jong uno uno u nongshong shnong, khamtam eh ïa ki briew kiba don jingthut ha ki dkhot met bad kiwei pat kiba donkam jingïarap.
Ka la pynshai ïa ka jingdonkam jong ka jingïarap aiñ kaba khlem jingsiew bad ka la ai jingïaroh ïa ka bynta jong ki Para Legal Volunteers (PLVs), kiba ka la batai ba ki long kum ki bynta ba kongsan jong ka DLSA.
Ka la ong ba kine ki nongïarap ki trei ban pynsngewthuh ïa ki paidbah shaphang ka aiñ, leit sha ki ïing ki sem, sngewthuh ïa ki jingeh jong ki paidbah bad ïarap ha ki kam kum ka jingïasoh Aadhaar, ka jingleh ïa ki syrnot Scheduled Tribe (ST) bad ki syrnot kha (birth certificate).
Ka la pynpaw ïa ka jingkyrmen ba kane ka jaka jingïarap kan pynlong ïa ki paidbah ban tip kham bha ïa ki hok jong ki bad ban ïoh ïa ka jingïarap kaba ki donkam.
Haba kren ha kane ka jingïalang, u Bah W. Kharbuli u la pynpaw ïa ki jingeh kiba ki paidbah nongkyndong ki ïakynduh. U la ong ba kumba 80 percent na ki shnong hapoh Khatarshnong-Laitkroh Block kim lah ban poi da ka surok.
U la kdew ruh ïa ki jingeh ha kaba ïadei bad ka jingïasoh Aadhaar bad ka jingïoh ïa ki jingshakri ha ka koit ka khiah. U la ban jur ïa ka jingdonkam jong ka jingïatreilang hapdeng ka ophis Block Development bad ka DLSA.
U la kyntu ïa ki nongshong shnong ban pyndonkam pura ïa kane ka Permanent Legal Aid Clinic, khnang ba kin tip ïa ki hok jong ki, ïada ïa ki hok bad pan jingïarap haba ki donkam.
Ka jingthmu jong kane ka Permanent Legal Aid Clinic ka long ban pynpoi ïa ki jingshakri aiñ kiba khlem jingsiew bad kiba suk ban ïoh sha ki paidbah nongkyndong.
