Ba jot rathai ka surok Dawki maramot hi ka RMEIA

0

Shillong, Nailar 13 : Ka Riwar Mihngi Exporters and Importers Association (RMEIA) ha ryngkat ka jingïatreilang bad ka HYC Riwar Mihngi ha ka sngi Thohdieng ka la marmot ïa ka surok naduh na Wahkdait kaba don harum Pynursla haduh j Dawki na ka daw ka jingjot bad jingbun ki thliew ki syar kaba la buh jingeh ym tang ïa ki trok kit maw hynrei khamtam eh ïa ki paidbah nongleit nongwan ba pyndonkam ban leit da kane ka surok.
Haba kren bad u President ka RMEIA u Bah Dibaron Khongbinan u la ong ba kane ka jingmaramot ka seng ka dei na ka daw ba ka kompeni kaba dei ban tih bad pynbha ïa kane ka phet noh pynban bad iehnoh ïa ka jingtrei jong ka.
“Ngim lah shah shuh ban shu peit kat kane ka jingsniew ba palat pud ka surok bad ban shu ap sah ïa ka kompeni namar wat ka kompeni kaba dei ban trei ruh ka la phet pynban” u la ong.
Haba la kylli pat la kane ka dei na ka daw ka jingleh sting u nongmihkhmat ka thaiñ uba dei ha ka juh ka por u Symbud Myntri Rangbah ka jylla u Bah Dibaron u la ong “Ngim lah ban kynnoh ïa u MLA namar na ka liang ka sorkar ka la dep aiti sha ka kompeni ba kan tih surok wat ban maramot ha ki jaka kiba sniew than mynba ka jingtrei ka dang ïaid shakhamat hynrei ka kompeni ba dei ban pyntrei ïa kane ka surok ka phet noh pynban haba kumta ngin kynnoh ïa u nongmihkhmat kan shong nia mo” u la bynrap shuh shuh.
Haba bynrap lang ïa kane u Samla Donaldson Pyngrope u President ka HYC u la ong ba ka jingwan sha khmat kum ka seng ban snohkti lang bad ka RMEIA ka dei namar ka ïohi ba ka leh ïa ka kam kaba pynmyntoi ïa u paidbah hi baroh.
Shuh shuh haba la kren pat halor ka jingmih khubor ba dang shen ba ki don ki nongñiah trok kiba shah shoh ha ki dkhot ka RMEIA u Samla Donaldson u la ong ba kam dei ka jingshisha ba don ka jingshah shoh na ka daw ba kim dei kiba na Riwar hynrei u la ong ba wat kiba shoh ïa ki ruh kim dei ki dkot ka RMEIA.
“Nga kwah ban kren da kaba shai ba kum ki nongshong shnong ka thaiñ ngim ju don jingsngew pher lada phi wan bylla bad wan trei sha ka thaiñ lada phi dei na kano kano ka thaiñ bad ki ktien shnong aiu phi kren lada phi wan hok ban bylla ban ban trei ym ban thaw jingkular bad pynbud nam ïa ka thaiñ” u la bynrap shuh shuh.

Leave A Reply

Your email address will not be published.