Khliehriat, ïaïong, 25: Ka ophis District School Education Officer (DSEO), East Jaiñtia Hills District ha ka sngi Palei ka la pynlong ïa ka prokram ba la tip kum ka “Understanding of Lifelong Learning for All in Society” halor ka phang, “A step Towards Literate India.”
Ka ULLAS ka dei ruh kaba don ïa ka thong ban pynkup bor ïa ki briew kiba la heh la san kiba dei ki nongshong shnong jong ka ri India kiba la duh noh ïa ka lad ban leit pule khnang ban ïarap ba kin lah ban nohsyniang lang ha kaba kyntiew ïa ka ri
Haba kren ha ka jingïalang, ka Additional Deputy Commissioner jong ka East Jaiñtia Hills District, ka Kong J.U. Kharpuri ka la ong, ba ka long shisha kaba donkam ban ai ka jingnang jingstad ïa ki briew kiba la heh la san kiba khlem ïoh ban leit skul bad ka jingnang jingstad ka dei ka ka atiar ba pynkup bor ïa uwei pa uwei u nongshong shnong jong ka ri khnang ban dup lah ban pynïaid beit ïaid ryntih ïa ki kam ki jam ba ki trei bad ka kyntu bad pynshlur ïa ki paidbah kiba la wan sha kane ka prokram ba kin pynïasnoh ïalade bad kane ka ULLAS programme.
Ka Kong Kharpuri ka la ong ruh ba kane ka long kaba donkam ruh na ka bynta ki nongrep kiba don ka bynta kaba ha khmat eh ha kaba nohsyniang ha ka khaïi ka pateng jong ka ri namar ki donkam ha kaba buh jingkheiñ jingdiah bad donkam ruh ban tip ban pyndonkam da ki jingstad ba thymmai ne ki degital kumta kane ka digital literacy ka donkam bha khnang haba pyndonkam ruh da ki kor ki bor, ka kyntu ruh ïa ki BDO ba ki dei ban pynshlur ïa ki paidbah ba ki dei ban pynïasoh bad kane ka ULLAS programme.
Ka District School Education Officer (DSEO), East Jaiñtia Hills District Kong . A.P. Syiem ka la batai shai ïa ka jingdonkam kane ka prokram bad pashat ruh katto katne ka jingmih na kito ki briew ki bym tip ka thoh ka pule, ka la pynpaw ruh ka jingsngew kmen haba ïohi ïa ki briew kiba la heh la san kiba wan ban pynïasoh bad kane ka ULLAS bad ong ruh ba kane ka ULLAS la buh ba kan dang ïai bteng haduh u snem 2027 bad ka don ruh ka jingbuh thong ba dei ban don haduh 12,000 ngut ki briew kiba na East Jaiñtia Hills District ki ban pynïasoh bad ka ULLAS ban ïoh ïa ka stda ka tip ha ka thoh ka pule.
Ka Kong Syiem ka la ai jingïaroh ïa ka jingtrei shitom ki nongtrei jong ka tnat pule puthi ha East Jaiñtia Hills District khamtam eh u Special Educator, uba dei ruh u District Nodal Officer, ULLAS, East Jaiñtia Hills District, u bah Salanbor Kamar uba trei shitom ha kaba kyntiew ïa kane ka prokram ULLAS’ da kaba u la lah ban wanrah haduh kumba 7731 ngut ki briew ki ban pule ban ïoh jingnang jingstad ha ka thoh ka pule.
Ka Consultant, State Centre for Literacy- State Literacy Mission Authrity (SCL-SLMA), Meghalaya, Shillong Kong Barikor Syiem ka la kren bad pynshai halor ka jingdonkam kane ka prokram ULLAS.
La pynbyrngia ïa ka prokram da ki jingrwai na ki khynnah skul jong ka Oxford Secondary School, Lad-Rymbai bad na ki nong pule jong ka ULLAS kiba na shnong Samasi Village, ka la don ruh ka jingsam ïa ki syrnot sha kito ki nongpule jong ka ULLAS kiba la lah ban pyndep ïa ka jingpule.
Ha kane ka sngi la ïadon lang u Block Development Officer, Lumshnong C&RD Block Bah Marioki Kyndait, u Sub-Divisional School Education Officer (SDSEO), East Jaintia Hills District Bah Onikson Sumer, u Special Educator & District Nodal Officer, ULLAS, East Jaintia Hills District Bah Salanbor Kamar, ki nonghikai jong ka ULLAS, ki nong pule bad kiwei kiwei.
