Shillong, K’Lyngkot 05: Ka jingïarap jong ka sorkar na ka bynta ban pynbha briew ïa ka nongbah Shillong bad kiwei pat ki jaka sor jong ka jylla lyngba ka jingïarap pisa ka la long kaba ïarap bha na ka bynta kane ka kam ban pynitynnad ïa kiba bun ki jaka.
Kane ka jingai jingïarap jong ka sorkar lyngba ka projek pynitynnad ïa ki jaka sor jong ka jylla ka la ïarap shibun bha ha kaba la ïohi ba haduh mynta mynne kiba bun na ki shnong ki dang pynneh ïa kane ka jingpynitynnad ïa la ki jong ki shnong ki thaw.
Katto katne na ki shnong kiba don ha nongbah Shillong, ki dei ka Dorbar Shnong Riatsamthiah, nangta ka dorbar Shnong Mawkhar ha kaba kine ki shnong ki la dep ban ai rong ai rup ïa la ki jong ki lynti shnong bad pynpur ruh da ki dim light ha ki lynti shnong.
Lah ban ong ba kane ka jingleh jong kine ki shnong ka la pynitynnad ïa ki shnong bad kumjuh ruh ka jingïoh jingïaroh na ki nongshong shnong bad kiba ïaid na kine ki lynti manla ka sngi.
Shuh shuh la ïohi ruh ba ki don katto katne ki shnong ruh kiba sla phah sait ïa ki lynti ïaid paidbah da ka um ha shwa ban wan ka aïom Khrismas bad kumjuh ruh ka jingpdiang sngewbha ïa u snem ba thymmai.
Lah ban ong ba kane ka jingïarap pisa jong ka sorkar ka la long ka jingmyntoi ïa ki katto katne tylli ki shnong kiba pyndonkam hok ïa la ka bhah ba ki la ïoh.
