Shillong, Nailar, 17: U Myntri Rangbah ka Jylla Conrad K Sangma ha ka sngi Ba-ar, ula ïathuh ïa kawei na ki jingphohsniew jong u ban pynthikna ba ki jingshakri jong ka Sorkar kin poi sha manla ki thliew ïing jong ki Nongshong shnong kam pher ïa ka por ne ka jaka ban pynurlong ïa kane ka jingphohsniew, ka Sorkar kan sa pyntreikam ïa ka program ba thymmai kaba la khot kyrteng ka ‘CM-CONNECT’.
Haba ban jur ïa ka synshar khadar ba janai, u Conrad ula ong ba hapoh kane ka CM-CONNECT, ka Sorkar kan sa sa buh ïa ki nongtrei ki ban tip kum ki Village Community and Data Facilitator ha manla ki shnong jong ka Jylla.
“Kawei na ka jingphohsniew jong nga ka long ban pynthikna ba ki jingshakri ka Sorkar kin poi ha manla ki thliew ïing jong ki Nongshong shnong ha ka por kaba dei wat sha ki jaka ba kyndong eh. Ban kynjoh ïa kane, ngin sa buh ïa ki Village Community bad Data Facilitator ha manla ki shnong ka Jylla. Kine ki briew kin dei na kine ki shnong ki thaw bad kin treikam kum ki briew ka Sorkar kiba lah ïakren bad leh eiei halor ki jingeh bad jingshakri ïa ki nongshong shnong. Baroh kine ki kam shakri ïa u paidbah kin treikam hapoh kane ka prokram ba thymmai ba khot ka CM-CONNECT” ula pyntip.
U Conrad ula ong ruh ba ka Sorkar ka la pyntreikam ïa kiba bun ki prokram ban pynjanai ïa ka synshar khadar lyngba ki kor technology bad ka jingsam ïa ki bor treikam. Ula kdew ba kawei na ki atiar ba khlaiñ eh ban pynjanai ïa ka jingshakri ka long ka jingdon ïa ka jingpynrung kyrteng ïa ki nongshong shnong ka Jylla. Kane ka jingpynrung kyrteng kan pynlah ïa ki tnad Sorkar ban ithuh ïa ki briew kiba dei ban ïoh jingmyntoi bad ban ai ruh ïa ki jingïarap khlem kano kano ka jingdkoh.
“Ban kynjoh ïa kane, ngin sa pyllait ïa ka Family ID Programme, ha kaba baroh ki Nongshong shnong bad ki longïing longsem ka Jylla kin pynrung kyrteng ïalade. Ki jingkyrshan ba la tyrwa lyngba ka FOCUS, YESS Meghalaya kin poi sha ki nongïoh bynta lyngba ka Family ID” ula ong.
