Dawa pynïoh 10 % ka bhah haka rukom thungkam bad ka bhah leit pule ïa ki khun ki nongbylla sngi

Jowai, Nailar 17: U myntri Rangbah ka jylla u Conrad K. Sangma ha ryngkat u symbud myntri rangbah ma Sniawbhalang Dhar mynta ka sngi kila wan sakhi lang ïa ka ha jingïalang bah kaba ‘8th Annual General Meeting’ jong ka All Jaiñtia Muster Roll Workers & Labour Union, Central Executive Committee (CEC), Jowai kaba la long mynta ka sngi ha Madan Kawang, Ummulong.
La pynlong ïa kane ka jingïalang kynthup naduh ki nongtrei Muster Roll ha ki tnad sorkar bapher bapaher, ki nongshet Mid Day Meal, ki Misteri bad baroh ki nongbylla sngi kiba don hapoh ka East bad West Jaiñtia Hills District.
La pynsngew ba ïa ka AJMW&LU la seng ïa ka naduh ka 17th August, 2018 kaba la ïaid lynti mynta la lai snem khynthih hapoh ka jingïalam jong u ma Khroo. L Pariat, kane ka seng ka ïeng ha ka nongrim ban dawa ïa ka hok jong baroh ki nongtrei bylla ba kim dei ban duh ïa ka hok longbriew manbriew kaba ki dei hok ban ïoh.
Ha kane ka sngi da ki spah ngut ki nongbylla sngi Muster Roll na kylleng ki jaka jong ka East bad West Jaiñtia kiba don hapoh ka lama ka AJMW&LU kila wan sha kane ka jingïalang kynthup kiba na Khasi Hills, Ribhoi bad Garo, ha ka juh ka por kila ïoh lad ïa phylliew jingmut lang na ka bynta ka jingbha jingmiat jong ka seng.
Kum ka dak ban burom ïa ka sorkar halor ka jingleh bah ïa ki jingdawa mynta ka sngi kila pynkup burom ïa u myntri rangbah bad kumjuh ïa u Symbud myntri rangbah, hadien kane ka prokram ha ka bynta kaba ar la pynkup burom kumjuh ïa ki nongïalam ka seng kiba la trei shitom met ba mynsiem ban pynïaid beit pynïaid ryntih ïa ki kam ba bha ka seng, la ai sngewbha kumjuh ïa ki khubor na Jaiñtia, ha kaba na ka liang u Editor u kot khubor YUTIP ma M.M. Thaiang ula ai ka jingkren kitbok ïa kane ka seng ki nongtrei bylla sngi ba kan dang ïaid shakhmat haka jingshakri.
Katba na ka liang u Myntri Rangbah ka jylla ula pynpaw ka jingsngewkmen ban ïadon bynta ha kane ka sngi leh burom ka seng AJMW&LU ïa u, ula ong hadien jong kane ka Election ula wan khnang mynta ka sngi kum ka sorkar ban ai ka jingkyrshan ïa ki nongtrei Muster Roll, ula pynsngew ba ka jingpoi jong u sha ka kyrdan myntri rangbah ka dei lyngba ka jingpynïaid jong u Blei kaba u khlem poi pyrkhat ïa kane namar ha ka snem 2018 ym pat long MLA.
Hapdeng ki jingïaid lynti jong ka sorkar hapoh ka jingïalam ka NPP naduh u snem 2018 kala ïa kynduh shibun ki jingeh, hynrei ka sorkar kam shem la kynran dien ha ka rukom treikam naduh ka kynhun myntri sha ki MLA, na ki Chief Secreatary sha u IAS ophisar, na ki MCS sha ki Engineer tad haduh ki nongrep bad ki khun samla bad kane ka sorkar ka long ïa baroh naduh kiba heh haduh kiba rit, ong myntri rangbah.
Shuh shuh ula pynsngew naduh ki snem kiba la leit na ka liang u ma K. Pariat bad u kiba juh ïakren ïa kane ka jingeh ba ki nongtrei Muster Roll ki ïa kynduh, kumjuh ïa ki nongshet ja sngi ha ki skul wat ha ka por ba ym pat long myntri rangbah. Hynrei naduh u snem 2018 ha ka jingïalang ka kynhun myntri ha ka sien kaba ar kiba shim khia ïa kane jingeh ki Muster Roll ban pynïoh noh ïaka tulop (Salary) haka por kaba biang kaba long manla u bnai kumba ïoh lem kiwei bad ban kyntiew ïa ka tulop manla u snem.
Ula ong ruh ki paidbah ki tip khambha ïa ki kam ba kane ka sorkar kala leh bad ha kane ka kynti ka sorkar hapoh ka jingïalam ka NPP kala ïoh ban wan biang ha ka bor namar ka jingshañiah jong u paidbah. Haoid ula ong ki don shibun ki jingshah kynthoh hynrei kum ka sorkar kan ïai trei na ka bynta ka jingbha jingmiat jong ka jylla hi baroh kawei da kaba wanrah ïa ka jingkylla ha kine ki sngi ban wan.
Ha kaba ïadei ban ka Memorandum ba la aiti da ka AJMW&LU ula kular ban pyntreikam kat ka bor jong u na ka bynta ki mad jingdawa, wat lada ym lah ban pyntreikam ïa baroh.
Ïa ka jingïalang la pynïaid da u samla Dapherborn N. Suchiang General Secretary ka AJMW&LU. La ïoh ruh ka jingkren na u Adviser ka seng ma Khroo. L. Pariat uba la buh ka jingkyrpad na u myntri rangbah ba un ïarap ïa ki khun jong ki nongtrei bylla sngi ba ka sorkar kan pynïoh lem ïa ka bhah kumba 10 percent ha ka rukom tungkam thung jam bad ka bhah leit pule.
Ula buh ruh ka jingkyntu ba ka sorkar kan ïarap ban ai ka jingïada ïa ki wah kiba doh hapoh ka Ri-Lum Jaiñtia kum ka wah Kupli, Myntdu, Myntang bad ka Myngngot khang ba yn ïoh ïa ka umbam kaba khuid ba suba.
La pynshong shit shuh shuh ïa kane ka sngi da ki jingrwai bad ki jingshad tynrai nalor kiwei de, ha kaba la don ruh ka jingpynkup burom ïa uwei na ki samla pule uba la wan sha khmat ha ka SSLC mynta u snem.