Lyngba ka CM -Connect ïoh pyllait im ïa u khynnah ba shah set bad pynlong mraw ha Kashmir

Shillong, Iaiong 28 : Kawei ka phone call ba pan jingïarap ha ka CM-Connect Helpline 1971 jong ka Sorkar Meghalaya, ka la lam sha ka jingïoh pynlait im ïa uwei u khynnah na Meghalaya uba la sahkut bad kynnoh shah pyntrei jubor kum u mraw ha kawei ka restaurant ha Kashmir, kaba shimpor tang da ki kynta ban leit shimti ïa une u Khynnah.
Ha ka 24 tarik Iaiong, ka jingïoh ïa ka phone call ba pan jingïarap ha u nombor 1971, uba dei u helpline number jong ka CM-Connect, la pyntyllun sted ïa ka kam ban leit pynlait ïa une u khynnah lyngba ka jingïatreilang bad kiwei ki Jylla.
Kane ka phone call ka pyntip ba une u Khynnah na Meghalaya ula sahkut ha Kashmir bad shah pynbor ban trei ha kawei ka restaurant hapdeng ka jingshah lehbeiñ. Kaba sngew shyrkhei ka long ba une u khynnah ula sdang ban pyrkhat wat ban pynmynsaw ïalade.
“Haba ïohi ïa ka jinglong kyrkieh ka kam, ka CM Connect hapoh ka jingïalam u Myntri Rangbah Conrad K Sangma, mar mar ka la buddien ïa kane ka case lyngba ki bor treikam bapher bapher bad pan ïa ka jingïatreilang na ki bor khmih ha Jammu & Kashmir” ong ka kyrwoh ha ka sngi Nyngkong.
Ki Ophisar ki la shimkhia ïa kane ka kam baroh shimiet, ban pynthikna ïa ka jingïakren ba khlem sangeh khnang ban pynthikna ïa ka jingleit pyllait ba mardor ïa une u Khynnah.
“Tang hapoh ki kynta, ka kynhun ba kynthup ïa u Assistant Labour Commissioner bad ka Anti-Human Trafficking Unit ha Jammy & Kashmir ki la lap dien ïa une u Khynnah” ong ka kyrwoh haba pyntip “ïa une u Khynnah la ïoh ban pynlait na kane ka restaurant bad la pynkynriah ïa u sha ka Shelter Home jong ka Sorkar”.
La pyntip ruh ba ka Sorkar ka la shimkhia ban leh eiei pyrshah ïa u nongaikam.
“ïa ka ejahar lah dep ban register, ka jingtohkit ruh ka la sdang bad la bthah ïa une u nongaikam ba un siew khuid lut ïa baroh ka bainong jong une u Khynnah” bynrap ka kyrwoh.
Ka Sorkar ka la kdew ïa kane ka jingjia kum ka sakhi ïa ka jingtreikam jong kane ka rynsan (CM Connect).“Kane ka jingjia ka pyni ïa ka jingtreikam bha ka CM Connect kum ka rynsan ban ïatreilang bad ki nongshong shnong. Naduh ba sdang pyntreikam ïa ka ha u Rymphang 2024, kane ka rynsan kala pynsuk ïa ka lad ai jingïarap ïa palat 70,000 ngut bad kumba 20,000 kiba ïoh ban ïakren markhmat, bad ka jingsngewhun ïa ka jingshakri ka kot haduh 95%” ong ka kyrwoh.
Ka Sorkar Jylla, hapoh ka jingïalam jong u Myntri Rangbah Conrad K Sangma, ka la ai jingithuh ïa kane ka jingtreikam kaba kloi bad ka jingkyrshan bala ai, kaba long kongsan ha ka ban pynthikna ïa ka jingïoh pynlait ïa une u Khynnah.
Ka Secretariat kala ïai ban ïa ka jingthmu jong kane ka helpline numbor. “Na ka bynta ki nongshong shnong, ka khubor ka long kaba shai : Ka jingïarap ka ap tang ïa kawei ka phone call. Kam pher shano phi don, ka CM Connect kan pynthikna ba ka sur jong phi kan poi sha ki bor ba dei peit ha ka lynti kaba sted bad ba treikam bha”.
“Dial 1971-namar man uwei pa uwei u nongshong shnong u don ka hok ban pynpaw bad ban shah skhor, bad man ka phone call ka long kaba kongsan” bynrap ka kyrwoh.