Lyngba ka 15th FC 20 tylli ki dukan pynshna u MDC Laban ha Lawsohtun

Shillong, K’Lyngkot 12 : U Nongïalam ka Liang Pyrshah ha Iing Dorbar jong ka KHADC, Bah Titos W Chyne ha ka sngi Saitjaiñ u la plie paidbah ïa ki 20 tylli ki dukan ha ka shnong Lawsohtun ia kiba la pynshna na skim kaba pynïoh lyngba u MDC ka thaiñ Bah Mitchel Wankhar.
Na kine ki 20 tylli ki dukan, 15 tylli ki don ha ka shnong Lawsohtun Block 6 bad 5 tylli pat ki don ha ka Block 4.
Na ka liang u MDC ka thaiñ Bah Mitchel Wankhar u la pyntip ruh ba ka jinglut na ka bynta ban shna ïa kine ki dukan ka long 60 lak ïa kiba kum u nongmihkhmat u la pynïoh na ka 15th Finance Commission.
La donlang ruh ha kane ka sngi naduh u Rangbah Shnong ka Lawsohtun, Bah H Rynjah, ki nongkitkam shnong bad kiwei kiwei.
Na ka liang u Rangbah Shnong haba kren ha kane ka sngi u la ai ka jingïaroh ïa kane ka sienjam ba u MDC u shim da kaba pynshna ïa kine ki dukan kaban long ka jingkyrkhu ïa kito kiba ïoh ïa ki.
U la ïathuh ba watla ki don tang 20 tylli ki dukan hynrei kiba pan pat ki don da ki spah ngut, kumta khnang ba kan ym don kano kano ka jingleh shilliang ki la shim da ka rai ban shu pynkhalai nusib.
Ha ka jingkren na u Bah Mitchel u la ïathuh ba ka jingïoh ban ai skim sha ki paidbah kum u MDC ka shong katkum ka jingwan ka skim, kata lada ïoh bun ka skim, kum ki MDC ruh ki lah ban ai bun sha ki paidbah ka constituency.
“Tangba ka jingleit jongngi sha District Council ka long ban long kum ka wait bad ka stieh bad ban thaw ïa ki aiñ ban ïada ïa ka khyndew ka shyiap, ka khaii pateng bad ïa ka riti dustur,” u la ong.
U la ïathuh ba ha ka por ba u dang bat kum u Executive Member ha ka Executive Committee ba ïalam da u Bah Titos kum u CEM u la ïoh ban don bynta shibun bha ki mat kiba ïadei na ka bynta ka jaidbynriew khamtam ha ka jingïoh ban pynlong aiñ ïa ka Land Bill, nangta ka Market Act bad ruh ïa ka Waste Mangement Act bad bun ki Act kiba ïadei bad ki Hima bapher bapher.
U Bah Titos haba kren kum u Kongsan u la ai ka jingïaroh ïa ka sienjam ba la shim da u MDC ban phah shna da ki dukan na bynta ki nongshong shnong. U la ong ruh ba ki paidbah ki dei ban sngewthuh ba ka kam MDC kam dei satia ban sam skim hynrei ki dei na ka bynta ban pynneh pynsah ïa ki riti ki dustur jong ka Jaidbynriew.