Nongstoiñ, Naiwieng 1 Ka Hynñiewtrep Youths’ Council West Khasi Hills District hapoh ka jingïalam u Samla Lumlang Kharsyiemlieh President bad Samla Wanteibok Lyngdoh Secertary, ha ka 1 tarik Naiwieng 2023, ka la leit kyrpad ïa u DC ka West Khasi Hills District, kum u khlieh ka District halor ki mat halor ka kam thungkam thungjam lyngba ka District Selection Committee.
Ha ka jingïakynduh bad u DC ka seng ka la kyntu ban pynbeit noh ïa ki exam ba ki samla wad kam ki la ap slem. Hooid lehse ka jingslem kawei ka dei na ka jingpynbeit ïa ka Roster System, hynrei mynta ka la dei ka por ïa ka DSC ban sdang noh, namar lada pynslem eh ka pynduh mynsiem ïa ki samla wadlam, khamtam kiba lajan kut ka karta ban wad kam.
Ka DSC ka dei ban khuid ha ka jingpynïaid ban shngaiñ ki samla wad kam, namar kumba la ïathuh ki samla wad kam ha kine ki snem ba la dep, la plie lypa ïa ki seal ki jingkylli. Lada ka long kumta ki samla wad kam kin duh jingshaniah ïa ka DSC.
Ha ka por thoh exam ba la pynbeit da ka DSC, ym dei ban shah ban rah mobile kumba long ha ki por ba la dep. Namar la ïathuh ki don kiba rah mobile ha ka por thoh exam, kane kam ai jingshaniah ïa ki samla wad kam.
Ïa ki Post Grade IV dei ban set jingkylli da ka ktien Khasi, namar ka DSC ka pan kyrdan Klass VIII ter ter lada ai da ki jingkylli ha ka ktien phareng long kumba leh shilliang ïa kiba hapoh Klass X. Kumjuh ruh ban buh CCTV Camera ha ka por pynlong exam bapher bapher hapoh ka jingpeit ka DSC.
Na ka ka liang u DC u la kular ban shimkhia ïa ki jingdawa ka seng. U la ong ka la dei ka por ka ki briew kiba stad kin ïoh kam ban kiew ka District. Ka Sorkar kan kham pyrkhing bha, kan buh ki Zonal Officers ban peit bniah.
U la ong ruh ba un pynbiang ki SOP bad shuwa ka jingthoh exam DSC, un pynbna paitbah bad ha ki khubor ruh khang kin tip. U kular ruh ban shimkhia ïa ka jingdawa ka seng, namar u kwah ban ka DSC kan khuid kan suba bad ban ïoh ïa ki samla ba stad ban kyntiew ïa ka dong ka thaiñ haba trei ha ki office sorkar.
