Leit jurip ka FKJGP ïa Jowai Civil Hospital, hadien ka jingïoh ujor na ki paidbah

Jowai, Risaw 28: Ka Federation of Khasi Jaiñtia & Garo People (FKJGP) hapoh ka jingïalam u President ka Jaiñtia Hills Zone u ma Tuesday Lytep bad u President ka West Jaiñtia Hills District Unit u Damien War mynta ka sngi 29 tarik u Risaw kila leit ïa kynduh ïa ka Superintendent ka Jowai Civil Hospital, Ialong.
Kane ka jingleit kynduh jong ka seng ka long hadien bala ïoh ka jingujor na ki paidbah halor ka jingbym treikam ka X-ray bad ka Scanning hapoh kane ka Hospital, haduh ba ki paidbah kila hap ban leit sha ki jaka jong ki riewshimet.
Na ka liang u Damien War ha ka jingkren ula pynpaw ka jingsngewkmen ban ïohi ba ka X-ray bad ka Scanning hapoh kane ka Hospital kila long kiba la treikam tangba ïa ka CT Scan kam pat treikam.
Shuh shuh u ma Damien ula ong ïa kiba bun ki test la leh ha kane ka Hospital bad la kyntu ïa ki paidbah ba kin leh ïa kine ki test naduh ka (X-ray bad Scanning) ha kane hi ka Hospital.
Katba u Tuesday Lytep ula ong ba ki dang don shibun ki jingduna hapoh kane ka Hospital naduh ki Nurse, ki Doctor, Grade IV, bad kiwei kiwei de.
Ula pyntip ba ka seng ha kine ki sngi ban wan shen kin sa leit ïa kynduh ïa ka Myntri jong ka koit ka khiah ka sorkar jylla ban pynsngew ïa ki jingdonkam hapoh katei ka Hospital.