Shillong, Iaiong 28 : U Myntri Rangbah ka Jylla Conrad K Sangma mynta ka sngi Thohdieng, ula leit ïuhkjat ha ki jingtei ba dang shna thymmai ban sah pyngngad ha ka jaka jngohkai ha Daribok, kaba don hakjat jong u lum Nokrek ha Ri-lum Garo.
Kine ki jingtei ki kynthup ïa ka jaka peitkai (viewing deck) ha Daribok bad ka surok na Oragitok sha Daribok, kaba lam sha ka jingnang kiew ha ka jingwan ki nongshangkai. Kane ka la wanrah ïa ka jingkharoi ki kam ki jam ba ai kamai jakpoh ïa ki nongshongshnong na ka kam jngohkai.
Haba buh hakhmat ïa ka jingbun ki nongwan shangkai ha Nokrek, u Myntri Rangbah ula bthah ïa ki Tnad treikam ka Sorkar ba kin ïatreilang kawei bad ban wanrah ïa ki sienjam ki ban pynthikna ba kane ka jaka kan lait naka jingbret jakhlia, plastic bad jingbun paid.
U Myntri Rangbah ula leit jurip ruh ïa ka jingtei ba dang ïaid shaid shaid jong ki ïing sah ki nongshangkai ha Daribok. Ula ong ba ka jingmih kine ki jingtei kan nang ïarap ban kyntiew ïa ka kam jngohkai ha Ri-lum Garo.
U Myntri rangbah ula bthah ruh ïa ki bor District bad ki Ophisar ka Tnad Tourism ban ïatreilang bad ki trai shnong bad sdang ïa ka jinglum pisa ïa ki nongwan shangkai lyngba ki ticket bad kumjuh ruh ïa ka jingpynïeng kali ha ki jaka ba la buh kyrteng kiba kham pajih naka Nokrek Biosphere Reserve. Ula pyntip ruh ba ka Sorkar kan sa pyndonkam da ki kali elektrik ban kit ïa ki nongshangkai na kane ka jaka pynïeng kali sha Daribok.
Ha kane ka jingleit ïuhkjat ha Daribok, u Myntri Rangbah ula leit jurip ruh ïa ka Sadhana Forest Information & Learning Centre, kaba aibor ïa ki trai shnong da ki jingtip ban ïada ia ka mariang khamtam ïa ki Khynnah.
Ka Sadhana Forest ka dei ka seng na shabar ri kaba thmu ban hikai ïa ki trai shnong bad ki volunteer halor ka jingpyn jyrngam ïa ka mariang bad ban kamai na ka kam. Ha u snem 2003, u Yorit bad u Aviram Rozin kila sdang ïa ka Sadhana Forest ha Auroville, India.
