Leit jngoh u Dr. Munjpara Mahendrabhai ïa kaAyush Hospital ha South West Khasi

Mawkyrwat, K’lyngkot, 17: U Union Minister jong ka Jylla uba dei peit ïa ka Women & Child Department bad Ayush jong ka Sorkar India, u Dr. Munjpara Mahendrabhai mynta ka sngi u la wan jngoh ïa ka One Stop Center bad Ayush Hospital, ki Aganwadi Center kiba don hapoh South West Khasi Hills District bad kumjuh ruh ka jingpynlong ruh ïa ka Review Meeting hapoh conference Hall, Circuit House, Laitlawsang, Mawkyrwat ha ryngkat ki katto katne ki ophisar sorkar jong ka ka distrik halor ka jingpyntreikam ïa ki lad pynroi jong ka sorkar India.
Ha kane ka sngi la ïoh ruh ka jingai ïa ki report treikam jong ki katto katne ki tnad treikam jong ki ophis bapher bapher jong ka South West Khasi Hills District kynthup ïa ka Mahatma Gandhi National Rural Employment Guarantee Schemes (MGNREGS), ka tnad ka koit ka khiah, ki surok, ka Swaach Bharat Mission (SBM), ka Pradhan Mantri Awas Yojana (PMAY), ka Jal Jeevan Mission (JJM), ka Janani Suraksha Yojana (JSY), ka Janasi Shishu Suraksha Karyakaram (JSSK) bad kiwei de ki jait skhim kiba la pyntreikam bad kumjuh ruh ki jingeh ba ki ïa kynduh ha ka ban pyntyllun ïa ka kam jong ki jait skhim.
U Dr. Munjpara Mahendrabhai haba kren ha ka jingïalang, u la ai jingmut ruh ïa ki lad ki lynti kumno ban pyntreikam ïa ki skhim ba la bhah da ka sorkar India. U la kdew ruh ha ka ïa dei bad ka koit ka khiah ha ka distrik da kaba u la ai jingmut ïa ki lad ki lynti ban nan kyntiew ïa ka kloi ka khiah hapoh distrik. U la ai jingmut ba dei ban don ka jingkilan met, ka jingleit phah check-up ba man ka por na ka bynta ki nongpang shini bad ula ban jur ba dei ban pyndonkam ïa ki Yoga namar ka ïarap ban pynduh ïa ka jingkyrni, jingshitom ha ka jingmut jingpyrkhat, ki jingkhuslai bad kiwei pat ki jait jingpang.
U Dr. Munjpara Mahendrabhai ula ong ruh ba dei ban da buh por ban pyndep ïa ka jingpyntreikam ïa ki skhim sorkar bad ym dei shuh ban pynsahteng ïa ki jingpyntreikam ïa ki na ka bynta ka jingmyntoi u paidbah. U la ai jingmut ban ai jingpyntip ïa ki nongpyntrei ïa kine ki skhim lada don ka jingsuki ha ki jingtreikam khnang ban kloi ka jingpyndep ïa ki projek bapher bapher.
U la ong ruh ba u kmen ban ïohi ba ka South West Khasi Hills District ka treikam bha bad kam long kaba shah iehnoh shadien wat hapdeng ki jingleh kiba bun ba dei ban ïa kynduh. U la ai mynsiem ruh ïa ki nongtrei hapoh ka distrik ba kin nang kham trei shitom shuh shuh bad ban aiti lut ha ka kam na ka bynta ka jingnangkiew shaphrang ha baroh ki liang hapoh ka distrik.
U Dr. Munjpara Mahendrabhai haba kren ha ki lad pathai khubor hadien ka jingïalang, u la ong ba ka jingwan jong u mynta ka sngi hapoh kane ka South West Khasi Hills District ka dei lyngba ka jingphah u Myntri ba Rangbah duh jong ka Ri India, u Narendra Modi ban wan peit ïa ki Jylla hapoh jong ka North East ha kaba ka Meghalaya ka dei kawei na ki jylla ba u la phah kyrpang namar ka dei kawei na ki jylla ba la pyntreikam bha ïa skhim ba la ai ha ka.
U la ong ruh ba kane ka jingwan jong u ka dei ruh kum shibynta ban jurip ïa ki katto katne ki kam pynroi ïa kaba na ka liang ka sorkar India ka la bhah bad ba la pyntreikam da ka sorkar Meghalaya namar ka sorkar India ka la dep ban bhah 90% bad na ka Sorkar Meghalaya pat 10%. Ha kane ka sngi u la pynpaw ruh ka jingaikhublei na ka bynta ki ophisar sorkar kiba la ai ka jingïatreilang ban pynbit pynbiang ïa ki jingdonkam na ka bynta kane ka sngi bad ka long ka jingïakynduhlang kaba jop.
Ha kajuh hi ka sngi na ka liang u Dr. Munjpara Mahendrabhai u la ïoh ruh ban aiti ïa ki Work order na ka bynta ban shna ïa ki surok na PWD (Roads) Mawbah sha Eitser ha shnong Mawlangwir kaba T. 9.67 lak bad ka Pung Amrit Sarovar kaba T. 9.20 lak ha Shnong Rangmaw ha kaba ïa ne yn pyntrei na ka skhim 100 sngi ne ka MGNREGS.
U bah E. Tariang, Child Development Project Officer (CDPO), Mawkyrwat, u Dr. F.R. Lartang, District Medical & Health Officer (DM&HO), South West Khasi Hills District, u bah S. Najiar, Executive Engineer, PHE, u bah K.C. Nongrum Executive Engineer. PWD (Roads) Ranikor Division Roads, ka kong S. Kharsahnoh, District School Education Officer (DSEO) bad u bah K. Snaitang, District Programme Manager (DPM) of DRDA ki la ai ki jingbatai ba lyngkot lyngba ka power point presentation ïa ki rukom pyntreikam ïa ki skhim ba la bhah da ka sorkar.
Kham hashwa, u bah T. Lyngwa, Deputy Commissioner, South West Khasi Hills District, Mawkyrwat u la ai ki kyntien pdiang sngewbha katba u bah L.T. Tariang, Additional Deputy Commissioner, South West Khasi Hills District u la ai ki kyntien khublei.