Shillong, Naiwieng 01 : Ki nonghikai, ki samla pule bad ki nongtrei ka Shillong Commerce College ha ka sngi Ba-ar ki la ai khublei khatduh ïa ka Dr. Sabita Sen, Principal hadien ba ka la shongthait na ka kam hadien ka jingshakri kaba khlem shongthait naduh u snem 1986 bad tad haduh ka 31tarik Risaw, 2023.
Ka Dr Sabita Sen ka la hikai ha kane ka College ha ka subject English bad dei ha u snem 2012 ka la kiew kyrdan kum ka Vice Principal. Dei ha u snem 2021 ba ka Dr. Sabita ka la shimti noh kum ka Principal haduh ka sngi ka la shongthait.
Ha kane ka sngi leh burom la donlang ruh naduh u Prof. Henry Lamin, President, Governing Body, Dr. M.A Jyrwa, Principal, PGT College, Dr. E Kharkongor, Principal Shillong College, Dr. V. Kharmawphlang, Dr. SL Marbaniang, Kong B. Massar kiba dei ki dkhot ka Governing Body jong ka college, ki nonghikai, ki nongtrei, ki Alumni bad ki samla pule kane ka college.
Na ka liang ka College ka la pynlong ka jingleh burom kaba shongkun bha da ki prokram ba harukom na ki samla pule ka College kiba la pynum bad pynglung mynsiem ym tang ïa ka principal ban shongthait noh, hynrei ïa baroh kiba donlang ha kane ka jingïalang leh burom bakyrpang.
