Latep donburom ïa u nongtrei ba nyngkong eh ka MLA uba la kiew na kam LDA sha ka shuki Secretary
ïam pangnud ki khun por ba rwai ha jingïaseng on tep ïa i T.Bn Noel
Shillong, ïaïong 04: ïa i T.Bn Noel Stone Thomas Khongji, u nongtrei ba nyngkong eh jong ka Meghalaya Legislative Assembly (MLA) la tep donburom mynta ka sngi ha u Lum Jingtep ka Balang Presbyterian Pynthorumkhrah.
I T.Bn Noel, idei u Nongsharai jong ka Balang Presbyterian Pynthorumkhrah naduh u snem 2005 ha kaba i la bat bun ki kam ha la ka Balang, ka District bad haduh ka Presbytery.
I T.Bn Noeal, i la rung kam ha Meghalaya Legislative Assembly ha ka snem 1970 ha ka por ba ka Meghalaya ka dang dei tang ka Sub State bad ha katei ka por i la trei tang ma i marwei kum u LDA bad u Secretary ka Assembly. Namar ka jingtrei shitom bad ka jingtreihok jong i, i la kiew shaduh ka kyrdan kum u Secretary ka Assembly tad haduh ban da shong thait ha ka snem 2004. Hadien ba i la shongthait, ka Assembly ka la thung ïa i kum u Adviser jong u Speaker. Hadiej ba la kut ka term la bteng ne extend biang ïa u, hynrei um shym la treh shuh namar ba u kwah ban shakri kum u Nongsharai ha la ka jong ka Balang.
Ha kane ka sngi leit on tep la don lang ki Parabangeit ka Balang, ki nongshongshnong ka Pynthorumkhrah, ki Pastor, ki Tymmen Basan bad kiwei ki paidbah babun. La pynïaid ïa ka jingïaseng ha ïing da u Rev. HE Marbañiang bad la ïoh ïa ka jingkren na ka liang ka ïing da u Rev AT Sohliya, u khun rangbah jong i. Nangta la ïoh jingkren ruh na ka liang ka Shnong Pynthorbah da u Rangbah Shnong, na ka liang ka Pynthorumkhrah Secondary School, na ka liang ka Kur Khongjhi da u para jong i T.Bn Khongji. Iwei na ki khun jong i, i la pule ïa ka poitri halor ka jingshakri i T.Bn Noel kum u kpa bad kumjuh ruh na ka liang ki khun bad ki ksiew bad bahaïing ki la ai ia ka jingrwai kyrpang. Dei ha ka por ba ki rwai ïa kane jingrwai “Sha ka Bneng Ri Phyrnai”, ba ki khun ki la ïam pangnud shiteng ka jingrwai kaba la pynlong ïa kiba bun ban jaw ummat.
Na ïing ïa ka met la rah ha ïingmane Balang Presbyterian Pynthorumkhrah, ha kaba la pynïaid ïa ka jingïaseng da u Moderator ka Shillong Rilum Presbytery, u T.Bn H. War. La pule ïa ka histori ka jingim i Tymmen Basan da u Secretary ka Balang bad la ïoh jingkren ruh na ka Pynthorumkhrah District bad ka Shillong Rilum Presbytery.
Ki Samla ka Balang ki la ai ïa ka jingrwai Choir ba kyrpang ha kane ka jingïaseng.
ïa i Tymmen Basan la tep ha u lum jingtep ka Balang Presbyterian Pynthorumkhrah.