Ka Sorkar kam dei ban phaidien ïa ka jingpyntreikam ïa ka Roster System shaduh u 1972 : KSU

Shillong, Ïaïong 04: U President ka Khasi Student Union (KSU) u Bah Lambokstar Marngar ha ka sngi Ba-ar u la ong ba ka seng ka pynpaw ïa ka jingsngew pyrshah ïa ka jingwanrah ka sorkar ïa ka Roster System ba kan treikam naduh u snem 1972 shakhmat bad maham ba lada ka sorkar ka kyrtiang dien biang shaduh u snem 1972 ka KSU ruh kam banse ban shim la ka bynta halor kane ka mat.
Haba kren sha ki lad pathai khubor hadien ba la wai ka General Executive Council ka KSU, u Bah Lambokstarwell u la ong u la ong ba lada khyllie ban pyntreikam ïa ka Roster System naduh u snem 1972, ka jingduh nong kaba khraw kan dei hi ïa ki khun samla na Ri-lum Khasi-Jaiñtia bad dei namar kane ka seng ka dawa na ka sorkar ban pyntreikam beit ïa ka Roster System naduh ka sngi kaba la mynjur ïa ka Roster shakhmat.
“Ki paidbah ka jylla kim dei ban sngewthuh bakla ba ka KSU ka sngap jar halor kane ka mat hynrei na ka liang ka seng naduh ki sngi ba la mih kane ka mat ka la dep ban ïakren bad ki riew paw khmat bad ki riewaiñ halor kane ban pan jingmut na ki kiba don ka jingtip bad ka jingsngewthuh kaba shai ïa ki aiñ bad ki policy,” u la ong.
“Ngam pat lah ban ïathuh kaei ka lynti ïaid jong ka KSU halor kane ka Roster System hynrei ka KSU ka la ïaid na ka bynta ka jingbha bad ka jingmyntoi ki khun samla Khasi-Jaiñtia bad ka mat jong ka Reservation Policy lei ha ka KSU kam dei shuh ka mat kaba dang thymmai hynrei kaba ka seng ka la shim khia naduh ki snem kiba kham mynshuwa namar ngi ïohi ïa ka jyrwit jyrwat jong ka” la ong u Bah Lambok.
U la ong ruh ba kane ka jingpyrshah ïa ka jingpyntreikam ïa ka Roster System naduh u snem 1972 kam dei ka mat tang jong ka KSU hynrei kadei ka mat jong baroh namar kadei ka kam ïap kam im jong ka jaidbynriew baroh kawei bad ka lawei ki khun samla ka ri bad ka jaidbynriew.
“Ïa kane ka kam ym dei ban shu ïa shim rai kyrkieh hynrei dei ban ïit ki lad lynti kumno ban ai jingmut ïa ka sorkar hynrei ka KSU ka kwah ban kren shai ba u paidbah ka jylla u la jied ïa ki nongthaw aiñ, hato kam dei mo ka kamram jong ki ban pyrkhat bha halor kane ka kam hynrei lada ka sorkar ka aiti sha ka KSU ban rai ngin shim roi noh mynta mynta hi” u la ong.
Shuh shuh u la ong ba ka seng ka la dep ban pynsngew sha ki nongmihkhmat halor ka Roster System bad lada ki nongmihkhmat ki rai bakla halor kane, baroh ki nongmihkhmat kin hap bah khlieh lada wan mih kano kano ka kynrum kynram kaba lah ban ktah ïa ka shongsuk shongshngaiñ hapoh ka jylla baroh kawei.